هێزە حکوومەتییەکان شاری نەوسوود رێگرییان لە بەڕێوەچوونی کۆبوونەوەی نارەزایەتیی هاووڵاتییان گرت

ئاژانسی کوردپا: بازاڕیان و دووکاندارانی شاری نەوسوود بۆ وەڵامدانەوە بە بانگەوازی لاوان و چالاکانی مافی مرۆڤی ئەو شارە، دوکان و بازاڕیان داخست.

بەپێی راپۆرتی ئاژانسی هەواڵدەریی کوردپا، ئەمڕۆ شەممە رێکەوتی ١٨ی خەزەڵوەر هێزە ئەمنیەتی و ئیتلاعاتییەکان و هەروەها هێزەکانی \"بەسیج\" بە کۆبوونەوە لە بەرانبەر بەخشداریی نەوسوود و دانانی کامێرای چاوەدێری، پێشیان بە کۆبوونەوەی ناڕەزایەتیی خەڵکی ئەو شارە گرت کە بڕیار بوو لەو شوینە بەڕێوە بچێت.

هەواڵنێری کوردپا لە شاری نەوسوودەوە رایگەیاند، بەشێکی بەرچاو لە خەڵکی شارەکانی جوانڕۆ، روانسەر، نۆدشە و پاوە بە مەبەستی بەشداریی لە رێوڕەسمی سەرەخۆشیی ئەو لاوەی کە بە دەستی هێزە ئینتزامییەکان کوژرابوو، بەشدارییان کرد.

هەواڵنێری کوردپا هەروەها رایگەیاند؛ نزیک بە ٩٥%ی دووکانەکانی ئەو شارە بە نیشانەی ناڕەزایەتی دەربڕین داخراوە و هاووڵاتییەکی دانیشتووی پاوە بە هەواڵنێری کوردپای راگەیاندووە : \"ئێمە بە ەمبەستی بەشداری کردن لە کۆبوونەوەی ناڕەزایەتیی بەردەم بەخشداریی شارەی نەوسوود هاتووینەتە شاری نەوسوود، بەڵام بەهۆی رێژەی زۆری هێزە نیزامی و ئینتزامییەکان لە بەردەم بەخشداری، ئەو کۆبوونەوەناڕەزایەتییە بەڕێوە نەچوو\".

یەکێک لە بەشدارانی رێوڕەسمی سەرەخۆشیی \"ئێحسان پەیام\" باسی لە ئامادە بوونی مەلا قادر قادری لەو رێوڕەسمەدا کرد و رایگەیاند: \" مەلا قادر قادری بە ئامادەبوانی راگەیاندووە کە خۆ لە توندوتیژی و ناڕەزایەتی ببوێرن و هەمان سەرچاوە باسی لەوەش کرد: \" یەکێک لە بەشدارانی خەڵکی روانسەر ناڕەزایەتیی بەو وتانەی مەلا قادر قادری، دەربڕی\".

کاتژمێر ٣ی بەرەبەیانیی رۆژی هەینی رێکەوتی ١٧ی خەزەڵوەر، هێزە چەکدارەکانی پاسگای \"ملاندەر\" لە ناوچەی نەوسوود، ٢ لاوی خەڵکی ئەو ناوچەیان داوەتە بەر دەستڕێژی گولـلە و لە ئەنجامدا یەکێکیان بەناوی \" ئێحسان پەیام\" تەمەن ٢٢ ساڵە و کوڕی محەممەد دەستبەجێ گیانی لەدەست دا و ئەو کەسەی دیکەشیان بەناوی \"کاوان حەیدەری\" کوڕی قەیسەر، بە توندی بریندار بووە.