مەهاباد؛ دەسبەسەرکرانی سیاوەش سوڵتانی، کوڕی کوبرا شێخە لە گیانلەدەستداوانی بزووتنەوەی ژن، ژیان، ئازادی لەلایەن هێزە ئەمنییەتییەکانەوە

سەرلەبەیانیی ڕۆژی سێشەممە ١٣ی خەرمانانی ١٤٠٣، سیاوەش سوڵتانی، کوڕی کوبرا شێخە لە گیانلەدەستداوانی بزووتنەوەی ژن، ژیان، ئازادی لە مەهاباد، لەلایەن هێزە ئەمنییەتییەکانەوە دەسبەسەر کرا و بۆ شوێنێکی نادیار ڕاگوێزرا.

بە وتەی سەرچاوەیەکی ئاگادار، کاتژمێر ٣ی سەرلەبەیانی، هێزە ئەمنییەتییەکان بە بێ بەڵگەی یاسایی هێرشیان کردووەتە سەر ماڵی سیاوەش سوڵتانی و بە توندوتیژییەوە ناوبراویان دەسبەسەر کردووە.

ڕۆژی ٥ی خەزەڵوەری ١٤٠١، کوبرا شێخەی تەمەن ٥٩ ساڵ و خەڵكی مەهاباد، لە درێژەی ناڕەزایەتییەکانی پاش بەخاکسپاردنی سمکۆ مەولوودی یەکێک لە گیانلەدەستداوانی ناڕەزایەتییەکانی خەڵکی مەهاباد بە تەقەی ڕاستەوخۆی هێزە سەرکوتکەرەکان گیانی لەدەست دا. فیشەکی جەنگی قوڕگی کوبرا شێخەی پێکابوو.