بۆکان؛ دەسبەسەرکرانی دوو هاووڵاتیی کورد لەلایەن هێزە ئەمنییەتییەکانەوە
دوو هاووڵاتیی کورد بە ناوەکانی "سیامەک هەیاسی" و "ئالان داغدار" خەڵکی گوندی حاجیاوای بۆکان لەلایەن هیزە ئەمنییەتییەکانەوە دەسبەسەر کران و بۆ شوێنێکی نادیار ڕاگوێزران.
بە وتەی سەرچاوەیەکی ئاگاداری کوردپا، دوانیوەڕۆی ڕۆژی چوارشەممە، ٣٠ی خاکەلێوە، هێزە ئەمنییەتییەکان بە بێ بەڵگەی یاسایی "سیامەک هەیاسی"یان دەسبەسەر کردووە و پاشان دەستیان داوەتە پشکنینی ماڵەکەی.
ئەم سەرچاوەیە ڕایگەیاند: هێزە ئەمنییەتییەکان دەستیان بەسەر هەندێ کەرەستەی تاکەکەسیی ناوبراو وەکوو لەپتاب، مۆبایل و فلەش مێمۆریدا گرتووە و لەگەڵ خۆیان بردووە.
ئەم سەرچاوەیە وتی: ڕۆژی سێشەممە ٢٩ی خاکەلێوە، ئالان داغدار بە بێ بەڵگەی یاسایی لە شوێنی کارەکەی خۆی و لەلایەن هێزە ئەمنییەتییەکانەوە دەسبەسەر کراوە.
تا کاتی بڵاوبوونەوەی ئەم هەواڵە لە هۆکاری دەسبەسەرکران و تۆمەتە وەپاڵدراوەکان دژی ئەم دوو هاووڵاتییە کوردە زانیارییەک لەبەر دەستدا نییە.
