زیندانییەک بە تاوانی "قەتڵ" لە زیندانی ورمێ بە دابینکردنی دیە لە ئێعدام ڕزگاری بوو

دیەی زیندانییەک بە تاوانی "قەتڵ" لە زیندانی ورمێ، بە ناوی "ئیبراهیم تاقە" کوڕی محەممەد خەڵکی شاری نەغەدە، لەلایەن خێرخوازان و چالاکانی مەدەنییەوە دابین کرا.

حەسەن تاقە برای ئەو زیندانییە لە وتووژێکدا، لەگەڵ ئاژانسی کوردپا ڕایگەیاند: "بنەماڵەی کوژراوەکە بە وەرگرتنی ٨٠٠ میلیۆن تمەن پارەی نەختی بە لێخۆشبوونی براکەم ڕەزامەندیان دەربڕیووە و ئەم بڕە پارەیە لەلایەن خێرخوازان و چالاکانی مەدەنییەوە، دابین کراوە".

ناوبراو ڕایگەیاند: "براکەم لە پەتی سێدارە ڕزگاری بووە و پاش کۆتایی قۆناغی یاسایی و ئیداری دۆسییەکەی ئازاد دەکرێت".

ئیبراهیم تاقە لە دەمەقاڵە و شەڕێکدا، ٨ ساڵ پێش هاووڵاتییەکی دیکە کوشتبوو.

ئەو هاووڵاتییە لەلایەن دەزگای قەزایی بە قیساس (ئێعدام) مەحکووم کرابوو و هەنووکە لە زیندانی ورمێ دایە.