٥٠ حاڵەتی خۆکوژی لە کوردستانی ئێران لە وەرزی بەهاری ٩٩دا

ئاژانسی کوردپا لە ڕاپۆرتێکی ئاماریدا، پڕژاوەتە سەر خۆکوژی لە کوردستانی ئێران لە سێ مانگی سەرەتای ئەمساڵ ٩٩دا

ئەم ڕاپۆرتە تەنیا باس لەو حاڵەتانە دەکات کە لەم ماوەیەدا، لەلایەن سەرچاوە فەرمی و نافەرمییەکانی میدیایی بڵاو کراوەتە و ئاماری ڕاستیی خۆکوژی زۆر زیاتر لەوەیە، کە لەم ڕاپۆرتەدا ئاماژەی پێ کراوە.

لە بەهاری ئەمساڵدا ٥٠ حاڵەتی خۆکوژی لە کوردستانی ئێران ڕووی داوە.

خۆکوژیی ژنان: ٢٨ حاڵەت

خۆکوژیی پیاوان: ٢٢ حاڵەت

جیاکردنەوەی ئاماری خۆکوژیی ژنان:

لەم ماوەیدا، ٢٨ی ژنی کورد خۆکوژییان کردووە.

٧کەس لەو ژنانە تەمەنیان لە ژێر ١٨ ساڵ بووە. (کەسێکیان ١٢ ساڵ، کەسێکی دیکەیان ١٤ ساڵ، ٣ کەس ١٦ ساڵ و ٢ کەس ١٧ ساڵ)

١٢ کەس لەو ژنانە ژیانی هاوبەشیان پێکهێناوە، ١٠ کەسیان سەڵت بوونه و ٢ ژنێکی دیکە دەزگیراندار بووه.

٣ کەس لەوانە قوتابی بوونه.

چۆنییەتی خۆکوژی ئەو ژنانەی کە هۆکارەکەیان ڕوون بووەتەوە:

 خۆهەڵواسین ١٠ حاڵەت، خواردنی حەب: ٥ حاڵەت، خۆسووتاندن: ٤ حاڵەت، خۆکوژی بە چەک حاڵەتێک، خۆفڕێدانەخوار لە بەرزایی: ٢ حاڵەت و هەروەها ٦ حاڵەتی ناڕوون.

هۆکارەکانی خۆکوژیی ژنان:

 کێشەی بنەماڵەیی ١٤ حاڵەت، هەژاری و دەسکورتی ٤ حاڵەت، بەزۆرەملێ بەشوودان: ٢ حاڵەت، خەمۆکی: ١ حاڵەتێک و نەبوونی موبایل بۆ بەشداری لە وانەکانی ئانلاین لە ماوەی دابڕگە بەهۆی کۆرۆنا: ١ حاڵەت.

جیاکردنەوەی حاڵەتەکانی خۆکوژی بەپێی پارێزگاکان: پارێزگای کرماشان ٣ حاڵەت، سنە: ١٥ حاڵەت، ئیلام ٤ حاڵەت و ورمێ ٦ حاڵەت.

جیاوازیی ئاماری خۆکوژیی پیاوان:

لەم ماوەیەدا، ٢٢ حاڵەت خۆکوژی لە نێو پیاوانی کورد ڕووی داوە.

٤ کەس کە تەمەنیان لە ژێر ١٨ ساڵ بووە.

لە نێو ئەم ئامارەدا، منداڵێکی کار، مامۆستایەک، زیندانییەک لە کاتی مەرەخەسی، کرێکارێک و ئیفلیجێکی شەڕ خۆیان کوشتووە.

چۆنییەتی خۆکوژی ئەو پیاوانە که ڕوون بووەتەوە:

خۆهەڵواسین: ١٠ حاڵەت، خۆسووتاندن: ٢ حاڵەت، خۆخنکاندن: ٢ حاڵەت و خواردنی حەب: ١ حاڵەت

هۆکاری خۆکوژیی پیاوان:

هەژاری: ١٤ حاڵەت، کێشەی بنەماڵەیی: حاڵەتێک و خەمۆکی: حاڵەتێک

جیاکردنەوەی حاڵەتەکانی خۆکوژیی پیاوان بەپێی پارێزگاکان:

سنە: ٨ حاڵەت، کرماشان: ٦ حاڵەت، ئیلام: ٢ حاڵەت و ورمێ: ٦ حاڵەت

بەپێی ئەم ڕاپۆرتە هۆکاری سەرەکیی خۆکوژیی ژنان کێشەی بنەماڵەیی و هۆکارەی سەرەکیی خۆکوژیی پیاوان هەژاری و بێکاری و گوشاری ئابووری بووە.

سەرەڕای ئەوەیکە لەم ئامارەدا، خۆکوژی لە سنە بۆ ژنان و پیاوان لە چاو پارێزگاکانی دیکە زۆرتر بووە، بەڵام دەبێت بوترێ ئاماری خۆکوژی لە پاڕێزگای کرماشان و ئیلام لە پلەی یەکەم دایە و ئەمەش نیشانەی بە میدیایی‌نەکردنی هەواڵی خۆکوژی لە ئێران و کوردستان دایە.

حکوومەتی ئێران لە بڵاوکردنەوەی ئامارێکی وردی خۆکوژی خۆی دەبوێری و ساڵانە تەنیا باس له ڕێژەی بەرزبوونەوە یان کەمبوونەوەی خۆکوژی بە شێوەی ڕێژەیەیی دەکات.

بەپێی دوایین ڕاپۆرتی ئاماری پزیشکی و تاقیکاریی ڕێکخراوی پزیشکی دادوەری، خۆکوژی لە ساڵی ٩٨دا بە بەراورد بە ساڵی ٩٧، ٨/. بەرز بووەتەوە کە پارێزگاکانی ئیلام، کرماشان، کۆهگیلوویە و بۆیر ئەحمەد، زۆرترین ئاماری خۆکوژیان هەیە.