بەرپرسانی زیندانی ورمێ، زیندانییانی پەیوەندیدار بە تاوانە ئاساییەکان وەکوو زیندانییانی سیاسی بە پشکێنەرانی دەزگای داد ناساندووە

سەرچاوەیەکی ئاگادار لە زیندانی ورمێ لە وتووژێکدا لەگەڵ ئاژانسی کوردپا، باسی لە ناساندنی زیندانییانی تاوانە ئاساییەکان وەکوو زیندانییانی سیاسی بە پشکێنەرانی دەزگای داد کرد.

ئەو سەرچاوەیە هەروەها ڕایگەیاند: "بەندی زیندانییانی سیاسی لەنێو زیندان جیا کراونەتەوە و هیچ کەس نازانێت ئەو بەندە بەندی زیندانییانی سیاسییە و ئەو بەندە لە کۆڵانێکی داخراو هەڵکەوتووە و بەرپرسانی زیندانی ورمێ هەتا ئێستا ئیزنی چاوپێکەوتنیان بە زیندانییانی سیاسی لەگەڵ پشکێنەرانی دەزگای داد نەداوە".

ئەو سەرچاوە ئاگادارەی کوردپا هەروەها وتی: "بەرپرسانی زیندانی ورمێ زیندانییانی تاوانە ئاساییەکانیان وەکوو زیندانیی سیاسی بە پشکێنەرانی دەزگای داد ناساندووە و پشکێنەرانی ئەو دەزگایە بە جێگای زیندانییانی سیاسی، لەگەڵ زیندانییە تاوانە ئاساییەکان چاوپێکەوتنیان کردووە. هەتا ئێستا چەندین جار زیندانییانی سیاسی بۆ ژووری تاکەکەسی ڕاگوێزراون و ئەوانیان ئازار و ئەشکەنجە داوە و هەڕەشەیان لە بنەماڵەکانیشیان کردووە.

ئەو سەرچاوەیە زیادی کرد: "زیندانییانی سیاسیی زیندانی ورمێ لە ناخۆشترین بارودۆخدا دەژین و هاتوچۆ بۆ بەندی زیندانییانی سیاسی قەدەغەیە و تەنانەت زیندانییانی سیاسی لە چوونە باشگا و پۆلەکانی فەرهەنگی، بێبەری کراون. گوشار بۆ سەر زیندانییانی سیاسیی ورمێ، لەلایەن محەممەدی، بەڕێوەبەری گشتیی زیندانەکان، بەخشی بەرپرسی زیندانی ورمێ و موختاری دادوەری جێبەجێکاری بڕیارەکان، دەبێت".

ئەو سەرچاوە ئاگادارە هەروەها ڕایگەیاند: "دوو ئەفسەر نیگەهبان نێو بەندی زیندانییانی سیاسی کلیل دەکەن و تەنیا کونێکی بچووک بۆ پەیوەندیگرتن لەگەڵ زیندانییانی سیاسی دەهێڵنەوە. لە ماوەی ڕابردوودا، کامران قاسمی، نائیب عەسکەری، شاکر بێهرووز، دارا ڕەشیدی و فیرووز موسالوو، بۆ ژووری تاکەکەسیی ڕاگوێزراون و ئەشکەنجە دراون".

زیندانییانی سیاسیی زیندانی ورمێ لە کۆتاییدا ڕوو لە ڕێکخراوەکانی داکۆکیکار لە مافی مرۆڤ ڕایانگەیاندووە کە بەرپرسانی زیندانی ورمێ، لەمەڕ بارودۆخی ئەوان کەمتەرخەمن و بەنیسبەت ئەو بارودۆخە دژکردەوە نیشان بدەن.