دیوانی باڵای وڵات داواکاریی پێڕاگەیشتن بە دۆسییەی ڕەزا ڕەسایی، زیندانیی سیاسیی مەحکووم بە لەسێدارەدران و لە دەسبەسەرکراوەکانی بزووتنەوەی ژن، ژیان، ئازادیی ڕەت کردەوە.
ڕۆژی دووشەممە ٢ی ڕێبەندان، کۆڵبەرێک بە ناوی "هوشیار مەحموودی" کوڕی ئەسکەندەر، خەڵکی گوندی "شمشێری" پاوە، لە ئەنجامی تەقەی هێزە سنوورییەکانی عێراق، لە ناوچەی "تێلوور"ی شۆشمێی پاوە، گیانی لەدەست دا.
سەرلەبەیانی ڕۆژی دووشەممە ٢ی ڕێبەندان، سێ هاووڵاتیی کورد بە ناوەکانی "شوانە خزرنژاد" کوڕی موراد، "ئەحەد خزرنژاد" کوڕی سلێمان و "سەلاح خزرنژاد" کوڕی موراد خەڵکی ئاوایی "گردەبن"ی شاری پیرانشار، لەلایەن هێزە ئەمنییەتییەکانەوە دەسبەسەر کران.
سزای ٦ مانگ بەندکرانی تەعزیریی ئازاد خانچەزەڕ، چالاکی کرێکاری و کۆمەڵایەتیی خەڵکی مەریوان، لەسەر بڕیاری پزیشکی دادوەریی پارێزگای سنە، بەهۆی نەبوونی توانایی بۆ تێپەڕاندنی ماوەی بەندکران، لە دادگای پێداچوونەوەدا بۆ سزای نەختی گۆڕدرا.
ڕۆژی یەکشەممە ١ی ڕێبەندان، هاووڵاتییەکی کورد بە ناوی "سیامەند مینا" دانیشتووی گوندی "گردەبەردان"ی مەهاباد، بە دانانی بارمتەی ١ میلیارد تمەنی و بە شێوەی کاتی لە بەندیخانەی ئەو شارە ئازاد، کرا.
ڕۆژی یەکشەممە ١ی ڕێبەندان، عەلا فەتحی، هاووڵاتیی خەڵکی شاری دیواندەرە بە دانانی بارمتە و بە شێوەی کاتی لە بەندیخانەی سنە ئازاد کرا.
هاووڵاتییەکی کورد بە ناوی "یەدوڵڵا شاکری"، کوڕی عەبدوڵڵا، خەڵكی دێولان لەلایەن لقی ١٠٢ی دادگای کەیفەری ٢ی ئەم شارەوە بە ٦ مانگ بەندکران، سزا درا.
شەوی شەممە، ٣٠ی بەفرانباری ١٤٠٢، مامۆستا فەرهاد سەلیمی، بەندکراوی عەقیدەتیی کورد کە لە بەندیخانەی قزڵحساری کەرەجە و سێ حەفتەیە مانی لە خواردن گرتووە، ڕەوانەی ژووری تاکەکەسی کراوە و مەترسیی لەسێدارەدرانی لەسەرە.
ڕۆژی ٣٠ی بەفرانباری ١٤٠٢، ڤیدیۆیەک لە توندوتیژیی هێزە سنوورییەکان لەگەڵ ژمارەیەک لە کۆڵبەرانی خەڵكی جوانڕۆ و مەریوان لە سنووری "تەویڵە" بڵاو بووەوە کە ئەم هێزانە وێڕای توندوتیژی، سەری ئەم کۆڵبەرانەشیان تاشیبوو.
سێ هاووڵاتیی کورد بە ناوەکانی "مستەفا سامی"، "هەژار ئەحمەدی‌ئازەر" و "سیروان سێپێهری"، خەڵکی بۆکان لەلایەن هێزە ئەمنییەتییەکانەوە دەسبەسەر کران.
ئاژانسی هەواڵدەریی کوردپا
