ئاژانسی کوردپا: ماڵپەڕەکانی وەزارەتی ئیتلاعات بەشداربووانی ڕێوڕەسمی نەورۆز "تەرەغە"ی شاری بۆکانی بە "تێکدەر و لایەنگەری لە دێموکرات و کۆمەڵە"زانیووە.

ماڵپەڕەکانی سەر بە وەزارەتی ئیتلاعات، دژکردەوەی سەبارەت بە ڕێوڕەسمی بەشکۆی جێژنی نەورۆز لە شاخی"تەرەغە"ی بۆکان، نیشاندا و ڕایگەیاند: "لایەنگەرانی دێموکرات و کۆمەڵە لە ڕۆژی ڕووناک بوونی خۆیان ڕاگەیاند.

ئەو ماڵپەڕانە دووپاتیان کردووەتەوە: "ڕێوڕەسمی نەورۆز لە شاخی تەرەغە، هاوکات لەگەڵ بانگەوازی حیزبەکانی دێموکرات و کۆمەڵە بەڕێوەچووە".

ئەو ماڵپەڕانە پێداگریان لە سەر لێپرسینەوە و هەڵسووکەوتی بەشداربووان لە ڕێوڕەسمی نەورۆز بوون و ڕوو لە ناوەندە ئیتلاعاتییەکان دەڵێن: "شیاوە، ناوەندە ئەمنییەتییەکان لەگەڵ تێکدەرانی شاخی تەرەغەی هەڵسووکەوت بکەن و ئیزنی خۆنیشان بە لایەنگەرانی گرووپە کوردییەکان لە ڕۆژی ڕووناک نەدەن و هەر چی زووتر بە نیسبەت پووچەڵکردنەوەی ئەم پیلانانە دەسبەکار بن و ئیزنی کەڵکوەرگرتن لە دوژمنان، لە بەڕێوەبردنی ڕێوڕەسمەی نەتەوەیی لە ئیران نەدەن".

ڕۆژی هەینی ٢٤ی ڕەشەممە ٩٧، هاووڵاتییانی شاری بۆکان بە ئامادەبوون لە شاخی "تەڕەغە" و بەڕێوەبردنی ڕێوڕەسمی بەشکۆی تەرەغە، بە پێشوازی جێژنی نەورۆز و ساڵی نوێوە، چوون.

بڵاوبوونەوەی هەواڵی ئەو ڕێوڕەسمە لە تۆڕە کۆمەڵایەتییەکان، خۆشحاڵی کاربەرانی تۆڕە کۆمەڵایەتییەکانی لێکەوتەوە.

ناوەندی هاوکاریی حیزبەکانی کوردستانی ئێران بە بۆنەی هاتنی سەری ساڵ و نەورۆز لە کوردستاندا کەمپەینێکی لەژێر ناوی "نەورۆز، سەمای ئازادی" وەڕێخستووە کە ناوەندە ئیتلاعاتییەکان، لە دژکردەوە بەو کەمپەینە، خەریکی دروستکردنی ترس و دڵەڕاوکێ لە نێو خەڵکدان دەستیان به دەسبەسەر کردنی چالاکانی کورد کردووە.