ڕێکخراوی لێبووردنی نێونەتەوەیی داوای لە بەرپرسانی ئێران کرد، لەبارەی چارەنووسی "هیدایەت عەبدوڵڵاپوور" بە زووترین کات ڕوونکردنەوە بدەن
ڕێکخراوی لێبووردنی نێونەتەوەیی ڕۆژی ٢٢ی جۆزەردان، بە بڵاوکردنەوەی بەیاننامەیەک، داوایان لە بەرپرسانی حکوومەتی ئێران کردووە کە بەبێ دواکەوتن ڕاستییەکانی پەیوەندیدار بە چارەنووس و شوێنی ڕاگرتنی هیدایەت عەبدوڵڵاپوور، ڕوون بکاتەوە؛ بەرپرسانی خۆجێیی لەم دواییانەدا بە بنەماڵەی ئەو زیندانییە کوردەیان ڕاگەیاندووە کە بە شێوەی نهێنی هیدایەت لەسێدارە دراوە.
هیدایەت عەبدوڵڵاپوور لە ئەنجامی دادگایەکی نادادپەروەرانە لە ساڵی ٩٦ بە ئێعدام مەحکووم کرابوو. ئەو زیندانییە لە ڕێکەوتی ٢٠ی بانەمەڕی ١٣٩٩ لە زیندانی ناوەندیی ورمێ بۆ شوێنێکی نادیار ڕاگوێزرابوو، لەو کاتەوە بنەماڵەکەی و پارێزەرەکانی ئەو زیندانییە بە بەردەوامی بۆ ئاگاداربوون و وەرگرتنی زانیاری سەبارەت بە چارەنووسی هیدایەت عەبدوڵڵاپوور لە هەوڵدان.
ڕۆژی چوارشەممە ٢١ی جۆزەردان، بەرپرسی ناوەندی تاوانەکان لە ورمێ بە بنەماڵەی هیدایەت عەبدوڵڵاپووری ڕاگەیاندبوو کە ئەو زیندانییە حەوتووی پێشوو لە شاری شنۆ ئێعدام کراوە، بەڵام ناتوانێت زانیاریی زیاتر لەو بوارە لەبەر دەستیان دابنێت، ئەمە لە حاڵێکدایە کە لە ماوەی سێ حەوتووی پێشوو، یەکێک لە بەرپرسانی دادستانی بە پارێزەرەکەی هیدایەت عەبدوڵڵاپووری ڕاگەیاندووە کە ئەو زیندانییە لە گرتنگەی ورمێ لەژێر چاوەدێریی سپای پاسداراندایە و ئاماژەی بە کاتی جێبەجێکردنی حوکمەکەی هیدایەت نەکردووە.
"دایانا ئەلتەحاوی"، جێگری بەخشی ڕۆژهەڵاتی ناوەڕاست و باکووری ئافریقای لێبووردنی نێونەتەوەیی، ڕایگەیاند: "کایەی بێڕەحمانەی بەرپرسانی ئێرانی لەگەڵ بنەماڵەی هیدایەت عەبدوڵڵاپوور شایەتی دیکەیە کە ئەوانە (بەرپرسانی ئێرانی) هیچ بەها و نرخێک بۆ گیان و کەرامەتی مرۆڤەکان دانانێن".
ناوبراو دەڵێت: "بەرپرسانی ئێرانی بە خۆبوواردن لە ئاشکراکردنی ڕاستییەکان، بەئەنقەست ڕەنج و ئازاری ڕەوانی تووشی ئەو بنەماڵەیە دەکەن. ئەگەر هیدایەت عەبدوڵڵاپوور بە شێوەی نهێنی لەسێدارە دراوە، دەبێ دەستبەجێ تەرمەکەی ڕادەستی بنەماڵەکەی بکەنەوە و لێکۆڵینەوەیەکی سەربەخۆ لەهەمبەر بارودۆخ و چۆنیەتیی ئێعدامی نایاسایی هیدایەت ئەنجام بدرێت".
بەپێی یاسای ئێران، بەرپرسان و بەڕێوەبەران دەبێ بەرنامەی ئێعدامی زیندانییان لە ماوەی ٤٨ کاتژمێر پێش لە جێبەجێکردنی حوکمەکەیان بە پارێزەرەکانی ڕابگەیەنن و ئیزنی چاوپێکەوتنیان بە بنەماڵەکەی بۆ دوایین جار بدرێت، ئێعدامی هیدایەت عەبدوڵلاپوور هەتا ئیستا بە ئاگاداریی پارێزەرەکانی ڕانەگەیەندراوە.
بەرپرسان و بەڕێوەبەران، مادام کە لە ئاشکراکردنی چارەنووس یان شوێنی ڕاگیرانی قوربانی یان تەرمەکەی خو دەبوێرن، "دیارنەمانی زۆرەملێ لە چوارچێوەی یاسا و ڕێسا نێونەتەوەییەکان" تاوان دێتە ئەژمار.
بەرپرسان و بەڕێوەبەرانی ئێرانی پیشینەی زۆریان لە لەسێدارەدانی نهێنیی ئەندامانی نەتەوەکان، ناشتنی ئەوان لە گۆڕە بێ ناو و نیشانەکان، خوبوواردن لە ڕاستییەکانی پەیوەندیدار بە چارەنووس یان شوێنی ناشتنی تەرمی لەسێدارەدراوەکانیان هەیە.
