٨ چالاکی ئایینی لە سنە دەسبەسەر کران
لە سەرەتای مانگی ڕەمەزانەوە، ٦ چالاکی ئایینی بە ناوەکانی "پەیمان و محەممەدعەلی ئێران پەنا، فواد زارعی، ڕەزا تەلیوار، مامۆستا محەممەد سەهیب عەلیمورادی و سەید محەممەد حوسێنی"، لە قوتابخانەی ئایینیی مزگەوتی "ئیبراهیم خەلیلوڵڵا" لە گەڕەکی "کانی کوزەڵە"ی سنە، لەلایەن هێزە ئەمنییەتییەکانەوە دەسبەسەر کراون.
ئەو ٦ چالاکە مەزهەبییە بۆ لێپرسینەوە ڕەوانەی گرتنگەی ئیدارەی ئیتلاعاتی سنە کراون و لە "چاوپێکەوتن لەگەڵ بنەماڵەکانیان" بێبەری کراون.
ڕۆژی شەممە ٣ی جۆزەردان، چالاکێکی ئایینیی دیکە بە ناوی "سەلاحەدین خدری" لەگەڵ ئەو ٦ چالاکە ئایینییە دەسبەسەر و بە دانانی بارمتەی ٢٠٠ ملیۆن تمەنی ئازاد کرابوو.
هەروەها مامۆستا "حوسێن عەلیمورادی"، بەڕێوەبەری قوتابخانەی ئایینیی مزگەوتی "ئیبراهیم خەلیلوڵڵا" لە سەرەتای مانگی ڕەمەزانەوە بانگهێشتی ئیدارەی ئیتلاعاتی سنە کراوە و لەلایەن مەئموورانی ئەو ناوەندە ئیتلاعاتییە لێپرسینەوەی لەگەڵ کرا.
هەتا کاتی بڵاوبوونەوەی ئەم هەواڵە، لە هۆکاری دەسبەسەرکردن و بانگهێشتکردنی چالاکانی ئایینی هیچ زانیارییەک لەبەر دەستدا نییە.
