هاووڵاتییەکی کورد لە نەغەدە دەسبەسەر کرا
ڕۆژی دووشەممە ١٠ی خەرمانان، هاووڵاتییەکی کورد بە ناوی "بایەزید قادری چووپان" دانیشتووی نەغەدە و خەڵکی گوندی "سنجلە" سەر بە بەخشی لاجانی پیرانشار، لەلایەن هێزە ئەمنییەتییەکانەوە دەسبەسەر کرا.
بە وتەی سەرچاوەیەکی ئاگادار، هێزە ئەمنییەتییەکان هێرشیان کردووەتە سەر ماڵی ئەو هاووڵاتییە کوردە و بەبێ بەڵگەی یاسایی دەستیان بە پشکنینی ماڵەکەی کردووە.
ئەو سەرچاوەیە هەروەها ئەوەشی خستەڕوو، ئەو هاووڵاتییە کوردە لە ماوەی دەسبەسەرکرانیدا، تەنیا جارێک پەیوەندیی تەلەفۆنیی لەگەڵ بنەماڵەکەی هەبووە و هێزە ئەمنییەتییەکان ناوبراویان ناچار کردووە کە بە زمانی فارسی لەگەڵ بنەماڵەکەی بدوێت.
ئەو سەرچاوەیە هەروەها ڕایگەیاند: "بنەماڵەی ئەو هاووڵاتییە لە چارەنووسی ناوبراو هیچ زانیارییەکیان نییە".
هەتا کاتی بڵاوبوونەوەی ئەم هەواڵە لە هۆکاری دەسبەسەرکردن و تۆمەتی وەپاڵدراو دژی "بایەزید" هیچ زانیارییەک لەبەر دەستدا نییە.
