هاووڵاتییەکی کورد لە شیراز دەسبەسەر کرا
11:18 - 8 خەرمانان 2720
ڕۆژی هەینی ٧ی خەرمانان، هاووڵاتییەکی کورد بە ناوی "مەهدی ئیبراهیم زادە" کوڕی "ئیبراهیم"، تەمەن ٣٧ ساڵ و خەڵکی سەردەشت، لە شیراز سەر بە پارێزگای فارس، لەلایەن هێزە ئەمنییەتییەکانەوە دەسبەسەر کرا.
ئەو هاووڵاتییە کوردە بەبێ بەڵگەی دادوەری دەسبەسەر کراوە و دواتر بۆ شوێنێکی نادیار ڕاگوێزراوە.
بە وتەی سەرچاوەیەکی ئاگادار، ئەو هاووڵاتییە کوردە ئایینی خۆی گۆڕیوە بۆ مەسیحییەت و بەو هۆیەوە لەلایەن هێزە ئەمنییەتییەکانەوە دەسبەسەر کراوە.
"مەهدی ئیبراهیم زادە" خێزاندار و دوو کچی تەمەن ٧ ساڵ و ١ ساڵی هەیە.
لە ماوەی ڕۆژانی ڕابردوودا هاوڵاتییەکی کورد بە ناوی "شێرکۆ سیاوەشی" کوڕی "محەممەد"، تەمەن ٣٧ ساڵ و خەڵکی سەردەشت، لەلایەن هێزە ئەمنییەتییەکانەوە دەسبەسەر کرا و بۆ شوێنێکی نادیار ڕاگوێزرابوو. پێشتر ئەو هاووڵاتییە ئایینی خۆی بۆ مەسیحییەت گۆڕیبوو.
