پیرانشار؛ ٨ ڕۆژ دەسبەسەرکران و ناڕوونیی چارەنووسی فەردین سەیدە
٢١ی ڕێبەندانی ١٤٠٤؛ سەرەڕای تێپەربوونی ٨ ڕۆژ لە دەسبەسەرکرانی سەرەڕۆیانەی "فەردین سەیدە"، لاوی کوردی خەڵکی پیرانشار، تاکوو ئێستا هیچ زانیارییەک سەبارەت بە دۆخ و چارەنووسی لەبەر دەستدا نییە و ناوەندە ئەمنییەتییەکانیش لەمبارەوە ڕوونکردنەوەیەکیان نەداوە.
سەرچاوەیەکی ئاگاداری کوردپا وێڕای پشتڕاستکردنەوەی ئەم هەواڵە وتی؛ "فەردین سەیدە"، کوڕی خالید ڕۆژی ١٣ی ڕێبەندانی ١٤٠٤ بەبێ بەڵگەی یاسایی لەلایەن هێزە ئەمنییەتییەکانەوە دەسبەسەر کرا و بۆ شوێنێکی نادیار ڕاگوێزرا.
دەسبەسەرکرانی ئەم هاووڵاتییە تەنیا دوو ڕۆژ دوای دەسپێکردنی ژیانی هاوبەشی بووە.
"فەردین سەیدە" لە ماوەی دەسبەسەرکرانیاندا لە دەسپێڕاگەیشتن بە پارێزەر و چاوپێکەوتن لەگەڵ بنەماڵەکەی بێبەری کراوە و ئەمەش نیگەرانیی بنەماڵەکەی بەدواوە بووە.
هەتا کاتی بڵاوبوونەوەی ئەم هەواڵە، سەبارەت بە هۆکاری دەسبەسەرکرانی ئەم هاووڵاتییە زانیارییەک لەبەر دەستدا نییە و هێزە ئەمنییەتییەکان ڕوونکردنەوەیەکیان لەمبارەوە نەداوە.
