لۆمار/ سیروان ؛ ٢١ ڕۆژ دەسبەسەرکران و ناڕوونیی چارەنووسی ئێلیاس جەوانمەرد
١٩ی ڕێبەندانی ١٤٠٤؛ سەرەڕای تێپەڕبوونی ٢١ ڕۆژ لە دەسبەسەرکرانی سەرەڕۆیانەی "ئێلیاس جەوانمەرد" هاووڵاتیی ٣٨ ساڵانی خەڵکی شاری "لۆمار" سەر بە شاری سیروان لە پارێزگای ئیلام، تاکوو ئێستا سەبارەت بە چارەنووس و شوێنی ڕاگیرانی زانیارییەک لەبەر دەستدا نییە و بنەماڵەکەی بەجیددی نیگەرانی دۆخ و چارەنووسی کوڕەکەیانن.
سەرچاوەیەکی ئاگادار وێڕای پشتڕاستکردنەوەی ئەم هەواڵە بە کوردپای وت؛ "ئێلیاس جەوانمەرد" ڕۆژی ٢٨ی بەفرانباری ١٤٠٤، بە بێ بەڵگەی یاسایی لەلایەن هێزە ئەمنییەتییەکانەوە دەسبەسەر کرا و بۆ شوێنێکی نادیار ڕاگوێزرا.
سەرەڕای بەدواداچوونی بەردەوامی بنەماڵە، تاکوو ئێستا هیچ وڵامێک لەلایەن ناوەندە ئەمنییەتییەکانەوە سەبارەت بە دۆخ و شوێنی ڕاگیرانی ناوبراو نەدراوە و بنەماڵە و نزیکەکانی بەجیددی نیگەرانی گیان و چارەنووسی ناوبراون.
ئەم هاووڵاتییە لە ماوەی ٢١ی ڕۆژ دەسبەسەرکرانی سەرەڕۆیانەدا، لە مافی دەستپێڕاگەیشتن بە پارێزەر و چاوپێکەوتن لەگەڵ بنەماڵەکەی بێبەری کراوە و درێژەکێشانی ناڕوونیی چارەنووسی، نیگەرانییەکان سەبارەت بە گیان و چارەنووسی بەدواوە بووە.
"ئێلیاس جەوانمەرد" خێزاندارە، منداڵی هەیە و سەرپەرستی بنەماڵەیە.
