کرماشان؛ یەک حەفتە دەسبەسەرکرانی سەرەڕۆیانە و ناڕوونیی چارەنووسی شەهاب نادری، لاوی ٢٧ ساڵان
١٨ی ڕێبەندانی ١٤٠٤؛ سەرەڕای تێپەڕبوونی یەک حەفتە لە دەسبەسەرکرانی سەرەڕۆیانەی "شەهاب نادری"، لاوی ٢٧ ساڵانی کووردی خەڵکی گەڕيکی "دەرەدرێژ"ی کرماشان، تاکوو ئێستا سەبارەت بە چارەنووس و شوێنی ڕاگیرانی زانیارییەک لەبەر دەستدا نییە. ئەمەش نیگەرانییەکانی لەمەڕ دۆخی گیانی و چارەنووسی ناوبراو زۆر کردووە.
سەرچاوەیەکی ئاگادار وێڕای پشتڕاستکردنەوەی ئەم هەواڵە بە کوردپای وت؛ "شەهاب نادری" لە ڕێکەوتی ١٢ی ڕێبەندانی ١٤٠٤، لەلایەن هێزە ئەمنییەتییەکانەوە و بە بێ بەڵگەی یاسایی دەسبەسەر کرا و بۆ شوێنێکی نادیار ڕاگوێزرا.
سەرەڕای بەدواداچوونی بەردەوامی بنەماڵەکەی، تاکوو ئێستا هیچ ڕوونکردنەوە یان وڵامێک لەلایەن ناوەندە ئەمنییەتییەکانەوە سەبارەت بە دۆخ و شوێنی ڕاگیرانی ئەم لاوە نەدراوە و ئەمەش نیگەرانیی بنەماڵەکەی زۆر کردووە. "شەهاب نادری" لە ماوەی یەک حەفتە دەسبەسەرکرانی سەرەڕۆیانەیدا بە تەواوەتی لە مافی دەستپێڕاگەیشتن بە پارێزەر و هەروەها چاوپێکەوتن و پێوەندیی تلفۆنی لەگەڵ بنەماڵەکەی بێبەری بووە و درێژەی ئەم ناڕوونییە ڕەهایەی چارەنووسی، نیگەرانییەکانی لەمەڕ گیان و چارەنووسی لای بنەماڵە و نزیکەکانی زۆر کردووە.
