"یاسر ئەمینی‌ئازەر'' بۆ تێپەڕاندنی ماوەی زیندانییەکەی ڕەوانەی زیندان کرا
ڕۆژی شەممە ٢٧ی بانەمەڕ، "یاسر ئەمینی‌ئازەر" مامۆستای قوتابخانەکانی مەهاباد، بۆ تێپەڕاندنی ماوەی زیندانییەکەی ڕەوانەی زیندان کرا.
شورای باڵای مەکتەب قورئان پاش ڕاگواستنی "یاسر ئەمینی‌ئازەر" بۆ زیندان ڕایگەیاندووە: "ئەگەرچی یاسر نەخۆشیی هەناسەبڕکێ و دڵ و هەروەها ئارتروزی ئەژنۆی هەیە و ئازار دەچێژێت؛ بەڵام هەتا ئێستا تووشی نەخۆشی کۆرۆنا و نەخۆشی مسری (واگیردار) نەبووە و تەندروستی لەو بارەیەوە جیگیرە و لەم بەدوا پاراستنی تەندروستیی ناوبراو لە ئەستۆی بەرپرسانی پەیوەندییدارە".
ئەم مامۆستایە، لەلایەن دادگای ئینقلابی شاری مەهاباد بەهۆی بەشداریکردن لە مانگرتنی سێنفیی مامۆستایان لە ڕاستای دادکۆکی لە داخوازیی فەرهەنگییان و پێڕاگەیشتن بە دۆخی نالەباری قوتابیان بە ١٥ مانگ زیندانی مەحکووم و ئەم حوکمەش لە دادگای پێداچوونەوەی ورمێ بەبێ لێکۆڵینەوە پشتڕاست کرابوو.
"یاسر ئەمینی ئازەر"، ڕۆژی سێشەممە، ١٧ی بانەمەڕی ساڵی ٩٨، لە کاتی چوونەدەرەوە لە قوتابخانە، لەلایەن هێزەکانی ئیتلاعاتەوە دەسبەسەر کرا و بۆ شوێنێکی نادیار ڕاگوێزرابوو.
ئەم مامۆستایە، بە هاندانی قوتابییان بۆ داخرانی قوتابخانە لە کاتی مانگرتنی مانگی ڕەشەمەی ساڵی ٩٧ و هاندانی مامۆستایان بۆ بەشداری لە مانگرتنەکان، تۆمەتبار کرابوو.
٢١ی خەزەڵوەری ساڵی ٩٧یش، ئەم مامۆستایە کوردە بە هۆکاری بەشداری لە مانگرتنی سەرتاسەریی مامۆستایان، بانگهێشتی ئیدارەی پەروەردە و بارهێنانی مەهاباد کرا و لێپرسینەوەی لەگەڵ کرابوو.
