هێزە ئەمنییەتییەکان لە بۆکان، هەواڵنێرێکی خەڵکی ئەو شارەیان بە ناوی "زەکریا ڕەسووڵپوور" دەسبەسەر کرد و پاش ٢١ ڕۆژ ڕاگرتنی لە گرتنگەی ئیتلاعاتی ئەو شارە، بە دانانی بارمتە هەتا کاتی دادگاییەکەی ئازادیان کرد.
ڕۆژی سێشەممە ٣١ی پووشپەڕ، لاوێکی کورد بە ناوی "ئەحمەد ناسری" خەڵکی بۆکان، بە دانانی بارمتەی ١٠٠ ملیۆن تمەنی لە زیندانی ئەو شارە ئازاد کرا.
"یاسر ئەمینی ئازەر" مامۆستای قوتابخانەی دواناوەندیی شاری مەهاباد، بۆ ماوەی ٥ ڕۆژ لە زیندانی ئەو شارە، ئیزنی مەرەخەسیی پێ درا.
ڕۆژی دووشەممە ٣٠ی پووشپەڕ، هاووڵاتییەکی کورد بە ناوی "خەلیل حوسێنی" دانیشتووی کرماشان، لەلایەن هێزە ئەمنییەتییەکانەوە دەسبەسەر کرا و بۆ شوێنێکی نادیار ڕاگوێزرا.
ڕۆژی دووشەممە ٣٠ی پووشپەڕ، کرێکارێکی کورد بە ناوی "مۆحسێن محەممەدپوور" تەمەن ٢٢ ساڵ کوڕی محەممەد سەلیم، لە کاتی کارکرد گیانی لەدەست دا.
ڕۆژی دووشەممە ٣٠ی پووشپەڕ، هێزە نیزامییەکانی حکوومەتی ئێران، بەبێ ئاگادارکردنەوەی پێشوو، کۆڵبەرێکی کوردیان بە ناوی "وەیسی حوسێن نژاد" خەڵکی گوندی "سگریک" سەر بە شاری چاڵدێران، دایە بەر دەسڕێژی گولـلە و برینداریان کرد.
ڕۆژی پێنجشەممە ٢٦ی پووشپەڕ، چالاکێکی مەزهەبیی کورد بە ناوی "جەعفەر ئوسافی" کوڕی "ئەحمەد"، تەمەن ٣٠ ساڵ و خەڵکی بۆکان، پاش تەواوبوونی ماوەی لێپرسینەوەکەی بۆ زیندانی ورمێ ڕاگوێزرا.
ڕۆژی دووشەممە ٣٠ی پووشپەڕ، نووسینگەی وەزارەتی ئیتلاعات لە حەوشەی زیندانی ناوەندیی ورمێ، "حوسێن عوسمانی"، زیندانیی سیاسیی کوردی بانگهێشت کرد و هەڕەشەی ئێعدامکردنی لێکرد.
ڕۆژی یەکشەممە ٢٩ی پووشپەڕ، کۆڵبەرێکی کورد خەڵکی شاری ماکۆ بە ناوی "ڕامین بلخکانلوو" خەڵکی گوندی "کشمیش تەپە"ی ئەو شارە، بە تەقەی هێزە سنوور پارێزەکانی حکوومەتی پێکرا.
ڕۆژی یەکشەممە ٢٩ی پووشپەڕ، یەکەم کۆبوونەوەی دادگایی کردنی دۆسییەی "سیروس عەباسی، فەریدە وەیسی و ئازاد عەباسی"، سێ چالاکی مەدەنیی کورد خەڵکی شاری دێولان، لە لقی یەکی دادگای ئینقلابی سنە بە سەرۆکایەتی دادوەر "سەعیدی" بەڕێوەچوو.
ئاژانسی هەواڵدەریی کوردپا
