بەپێی ڕاپۆرتی ئاماری ناوەندی ئێران لە وەرزی پاییزی ٩٩دا، پێوانەی نرخی کرێچییەتی یەکەکانی نیشتەجێبوون لە شارەکان، گەیشتە ٢٠٩ ڕەقەم، کە بەنیسبەت وەرزی پێشوو واتا هاوین (٨.١٩٥) واتە ٨.٦ لەسەد زیادی کردووە.
لە ماوەی ڕۆژانی ڕابردوودا، حوکمی دوو هاووڵاتیی کورد بە ناوەکانی "سەفەر نووری و فەرهاد نووری" خەڵکی گوندی "ئەنبێـ"ـی ناوچەی تەرگەوەڕ، لە لقی ١٣ی دادگای پێداچوونەوەی ورمێ، لە ٥ ساڵ زیندانیی تەعزیریی بۆ ساڵێک زیندانیی تەعزیریی کەم کرایەوە.
نوێنەری کرێکارانی شارەوانیی ئیلام، پاش وتووژێک لەبارەی کێشە و گرفتی کرێکاران و بەدواداچوون بۆ داواکاریی مووچەی دواکەوتوویان، لە لایەن بەرپرسانی شارەوانیی ئیلامەوە لە کارەکەی دەرکرا.
دوو هاووڵاتیی کورد بە ناوەکانی "عومەر خاگزاد و عەباس سدیقی" خەڵکی گوندی "شێلم جاڕان"ی سەر بە پیرانشار، لە لایەن دادگای ئینقلابی ئەو شارەوە، هەرکامەیان بە ٥ ساڵ زیندانی تەعزیری مەحکووم کران.
ڕۆژی یەکشەممە ١٤ی بەفرانبار، جەوانمیر مورادی چالاکوانی کرێکاری لە کرماشان، لە لایەن هێزە ئەمنییەکانی ئێرانەوە دەستبەسەر و بۆ شوێنێکی نادیار ڕاگوێزراوە.
دادگای ئینقلابی سەقز، هاووڵاتییەکی کوردی بە ناوی "سوبحان (ڕاشد) ئەحمەدی" کوڕی جەلیل و خەڵکی شاری کامیاران، بەبێ ئامادەبوونی خۆی بە ساڵێک و یەک ڕۆژ زیندانی تەعزیری مەحکووم کرد.
زیندانییەکی تۆمەتبار بە "قەتڵ" بە ناوی "سەعید محەممەدیفەرد" تەمەن ٣٥ ساڵ و خەڵکی شاری کرماشان، بە لێخۆشبوونی بنەماڵەی کوژراوەکە، لە پەتی سێدارە ڕزگاری بوو.
هەواڵدەریی حکوومەتی فارس لە زاری فەرماندەی تیپی ٢٦٤ی هێزە سنوورپاڕێزەکانی ئەرتەش، بڵاوی کردووەتەوە، لە سنووری شاری مێهران سەر بە پاڕێزگای ئیلام شەڕ و تێکهەڵچوون لە نێوان هێزەکانی ئەرتەش و کەسانێکی نەناسراودا ڕووی داوە.
ڕۆژی پێنجشەممە ١١ی بەفرانبار، وەرزشوانێکی بۆکانی بە ناوی "واحید ئیبراهیمیان" کوڕی محەمەدئەمین و خەڵکی شاری بۆکان، پاش چوار مانگ و ١٦ ڕۆژ لە دەسبەسەرکرانی، لە یەکێک لە گرتنگە ئەمنییەکان لە شاری تاران، ئازاد کرا.
لەماوەی ڕۆژانی ڕابردوودا، هاووڵاتییەکی کورد بە ناوی "ئەسکەندەر سەیدمحەممەدپوور"، خەڵکی شنۆ بۆ تێپەڕاندنی ماوەی حوکمەکەی بۆ زیندانی ئەو شارە ڕاگوێزراوە.
ئاژانسی هەواڵدەریی کوردپا
