ڕۆژی چوارشەممە ٢٥ی خاکەلێوە، سێ هاووڵاتیی کورد بە ناوەکانی "ئارام نیکپێی"، "سەیوان پەرتۆ" و "جەماڵ گرامی"، خەڵکی گوندی "نێـ"ـی مەریوان، بە دانانی بارمتە بە شێوەی کاتی لە زیندانی ئەو شارە ئازاد کران.
حوکمی ئێعدامی ئەرسەلان خودکام، زیندانیی سیاسیی کورد، خەڵکی مەهاباد بۆ زیندانی هەتاهەتایی گۆڕدرا.
هاووڵاتییەکی کورد بە ناوی "سەلاح بەهرامییان"، خەڵکی گوندی "گوندەوێڵە" سەر بە شنۆ، پاش دەسبەسەرکرانی لەلایەن هێزە ئەمنییەتییەکانەوە، بۆ لێپرسینەوە ڕەوانەی یەکێک لە گرتنگە ئەمنییەتییەکان لە ورمێ کراوە.
سەرلە بەیانی ڕۆژی سێشەممە ٢٤ی خاکەلێوە، هاووڵاتییەکی کورد بە ناوی "سەعید کەرەمی" خەڵکی شاری "پەهلە"، ناوەندی بەخشی "زەڕیناوا"ی شاری دێهلۆڕان، لەلایەن هێزە ئەمنییەتییەکانەوە دەسبەسەر کرا.
دۆسیەی زارا محەممەدی، مامۆستای زمانی کوردی و ئەندامی ئەنجومەنی فەرهەنگی ــ کۆمەڵایەتیی "نۆژین"، بۆ پێداچوونەوە ڕەوانەی دیوانی باڵای وڵات کراوە.
ڕۆژی دووشەممە ٢٣ی خاکەلێوە، سێ کەس لە پێرسۆنێلی ئیدارەی ئاو و ئاوەڕۆی شاری سنە، لە کاتی هەڵکەندنی چاڵ، بەهۆی داتەپینی دیوار، یەکێک لەو سێ کرێکارە بە ناوی "جەبار ئیمامی نژاد" تەمەن ٣٤ ساڵ، گیانی لەدەست دا.
سەرلەبەیانیی ڕۆژی سێشەممە ٢٤ی خاکەلێوە، هاووڵاتییەکی کورد بە ناوی "ستار کەریمی"، خەڵکی شاری "پەهلە"، ناوەندی بەخشی "زەڕیناوا"ی شاری دێهلۆڕان، لەلایەن هێزە ئەمنییەتییەکانەوە دەسبەسەر کرا.
لایەنگرانی ژینگەپارێزی لە شاری شنۆ، لە هەڵمەتێکێدا، دەستیان بە کۆکردنەوەی زبڵ و پاشماوە فڕێ دراوەکان لەلایەن گەشتیارانەوە لە داوێنی سروشتی "کوچە باغـ"ـی ئەو شارەوە کرد.
سەرلەبەیانیی ڕۆژی دووشەممە ٢٣ی خاکەلێوە، حوکمی ئێعدامی زیندانییەک بە ناوی "ئەرسەلان مورادی"، کوڕی عەبدوڵڵا و خەڵکی شاری دیواندەرە، لە زیندانی ناوەندیی بیرجەند جێبەجێ کرا.
ڕۆژی یەکشەممە ٢٢ی خاکەلێوە، هاووڵاتییەکی کورد بە ناوی "سەلاح بەهرامییان"، خەڵکی گوندی "گوندەوێڵە" سەر بە شنۆ، لەلایەن هێزە ئەمنییەتییەکانەوە دەسبەسەر کرا.
ئاژانسی هەواڵدەریی کوردپا
