لە ماوەی ڕۆژانی ڕابروودا هاووڵاتییەکی کورد بە ناوی "سلێمان گوڵی" کوڕی "محەممەدسەلیم"، تەمەن ٢٥ ساڵ و خەڵکی گوندی "عەلیاوای یاپەڵ" سەر بە شاری دیواندەرە، بە دانانی بارمتە لە یەکێک لە گرتنگە ئەمنییەکانی سنە ئازاد کرا.
ڕۆژی پێنجشەممە ٨ی ڕەزبەر، حوکمی لەسێدارەدانی زیندانییەک بە ناوی "ماشاڵڵا سەبزی" بە تۆمەتی "کوشتنی بەئەنقەست" لە زیندانی دیزڵاوای کرماشان، جێبەجێ کرا.
ڕۆژی شەممە ١٠ی ڕەزبەر، حوسێن عوسمانی، زیندانی سیاسیی کورد خەڵکی شاری مەهاباد لە زیندانی ورمێ پاش ٨ ساڵ زیندانی ئیزنی مەرەخەسی پێدرا.
ڕۆژی یەکشەممە ١١ی ڕەزبەر، دوکتور ئیمان نەوابی لە نەخۆشخانەی "کەوسەر"ی شاری سنە، باسی لە ئاگرتێبەردانی کچێکی تەمەن ٢٢ ساڵە، لەلایەن باوکییەوە، بەهۆی "هەبوونی پێوەندیی خۆشەویستی لەگەڵ کوڕێک" لە لاپەڕەی ئینستاگرامییەکەی کرد.
ڕۆژی یەکشەممە ١١ی ڕەزبەر، ئارام مورادیان کوڕی عوسمان خەڵکی گوندی "تەنگیسەر" سەر بە ناوچەی ژاوەرۆی سنە بە دانانی بارمتە لە زیندانی ئەو شارە ئازاد کرا.
"هیوا محەممەدزادە" برای "ئومید محەممەدزادە" کۆڵبەری کوژراو بە تەقەی هێزە نیزامییەکان لە شاری سەردەشت، لە وتووێژێک لەگەڵ هەواڵدەریی حکوومەتیی "ئیلنا" ڕایگەیاند: "هەنگی سنووری بەبێ ڕاهێنانی تەقەکردن، تەقە لە هەموو کەس دەکەن".
لە ماوەی ڕۆژانی ڕابردوودا هاووڵاتییەکی کورد بە ناوی "حەیدەر عەلیزادە" خەڵکی گوندی "قەزەناوێ"ی شاری شنۆ، بە دانانی بارمتە لە گرتنگەی ئیدارەی ئیتلاعاتی ورمێ ئازاد کرا.
ڕۆژی شەممە ١٠ی ڕەزبەر، هاووڵاتییەکی کورد بە ناوی "میکائیل منبەری" خەڵکی گوندی "نییەر" و دانیشتووی شاری سنە، بە دانانی بارمتەی قورس لە زیندانی ئەو شارە ئازاد کرا.
لقی ١ی دادگای ئینقلابی شاری سەقز، چالاکێکی میدیایی بە ناوی "کەیوان ڕەحیمیـ"ـی بە چوار مانگ زیندانی تەعزیری مەحکووم کرد.
ڕۆژی پێنجشەممە ٧ی ڕەزبەر، هاووڵاتییەکی کورد بە ناوی "زانیار مورادی" کوڕی "جەلال"، خەڵکی گوندی "کێلە کەوو"ی شاری دیواندەرە، بە دانانی بارمتە لە گرتنگەی ئیدارەی ئیتلاعاتی سنە ئازاد کرا.
ئاژانسی هەواڵدەریی کوردپا
