ڕۆژی چوارشەممە ٦ی ڕێبەندان، کۆبوونەوەی دادگاییکردنی عوسمان ئیسماعیلی و مەحموود ساڵحی، دوو چالاکی کرێکاریی خەڵکی شاری سەقز بە تۆمەتی "پڕۆپاگەندە دژی نیزام" لە لقی سێی لێپرسی دادگای ئینقلابی ئەو شارە بەڕێوە چوو.
ڕۆژی سێشەممە ٥ی ڕێبەندان، هاووڵاتییەکی کورد بە ناوی "چیا ئاقابەیگ‌پوور" کوڕی ئەحمەد خەڵکی گوندی "ڕەحیم‌خان" سەر بە بۆکان، بۆ جێبەجێکردنی حوکمی زیندانییەکەی، ڕەوانەی زیندانی ئەو شارە کرا.
ڕۆژی سێشەممە ٥ی ڕێبەندان، کۆڵبەرێکی کورد بە ناوی "میلاد ڕۆستەمی" کوڕی حوسێن خەڵکی گوندی "حەشمر" سەر بە شاری سەلاس باوەجانی، بە تەقەی هێزە نیزامییەکانی حکوومەتی لە سنووری نەوسوود پێکرا.
ڕۆژی شەممە ٢ی ڕێبەندان، شاکر باغی، زیندانیی سیاسیی خەڵکی شاری "وان" سەر بە کوردستانی تورکیە، پاش ١٤ ساڵ زیندانی لە زیندانی کاشمەر سەر بە پارێزگای خۆراسان، هاتە مەرەخەسی.
سێ هاووڵاتیی بە ناوەکانی "یووسف ئەمینی"، "موراد ساعی" و ئاسۆ شێخە" خەڵکی شاری شنۆ، لەلایەن هێزە ئەمنییەتییەکانەوە دەسبەسەر کران و بۆ شوێنێکی نادیار ڕاگوێزراون.
لە ماوەی ڕۆژانی ڕابردوودا، هاووڵاتییەکی کورد بە ناوی "سەلاح عوسمانی" تەمەن ٤٤ ساڵ خەڵکی گوندی "خەراپە" و دانیشتووی گوندی "ڕزگاری (کارخانە قەند)" سەر بە شاری پیرانشار، لەلایەن ئینقلابی ئەو شارە لە تۆمەتە وەپاڵدراوەکەی، بێتاوان ناسرا.
ڕۆژی یەکشەممە ٣ی ڕێبەندان، هاووڵاتییەک بە ناوی "فەرهاد حەسەن‌زادە" تەمەن ٢٣ ساڵ کوڕی حەمزە خەڵکی گوندی "گوندەوێڵە" سەر بە شاری شنۆ، بە خۆهەڵواسین کۆتایی بە ژیانی خۆی هێنا.
ڕۆژی دووشەممە ٤ی ڕێبەندان، هاووڵاتییەکی کورد بە ناوی "سیامەند خواڕەزم" خەڵکی گوندی "ئاڵیاوێـ"ـی شنۆ، لەلایەن هێزە ئەمنییەتییەکانەوە دەسبەسەر کرا.
کرێکارانی شارەداریی شاری مێهران سەر بە پارێزگای ئیلام، ماوەی چوار مانگە، پارەیان وەرنەگرتووە.
ڕۆژی یەکشەممە ٣ی ڕێبەندان، چالاکێکی مەدەنیی کورد بە ناوی "فەرهەنگ عێوەزی"، کوڕی "محەممەدعەلی"، تەمەن ٣٠ ساڵ و خەڵکی گوندی "تەنگیسەر" سەر بە سنە، پاش ٤٣ ڕۆژ لە دەسبەسەرکرانی بە دانانی بارمتە لە گرتنگەی ئیدارەی ئیتلاعاتی ئەو شارە ئازاد کرا.
ئاژانسی هەواڵدەریی کوردپا
