لە ڕۆژی سێشەممە ٣ی ڕەشەمەوە، "محەممەد هوشەنگی" هاووڵاتیی کوردی خەڵکی شاری جوانڕۆ، بەنیسبەت دژایەتیکردنی ئیتلاعاتی سپا لەگەڵ ئازادیی ناوبراو، مانی لە خواردن گرتووە.
فواد مەهدی ئیبراهیمیان، کۆڵبەری تەمەن ٢٤ ساڵە خەڵکی شاری سەردەشت کە ڕۆژی دووشەممە ٢ی ڕەشەمە، بەهۆی تەقینەوەی مین لە سنووری بانە، بە سەختی بریندارببوو، لاقی ڕاستی لەو ڕووداوە، لەدەست دا.
هەواڵدەرییەکانی حکوومەت باسیان لە پێنەدانی پارەی دوو مانگی کرێکارانی شارەداریی شاری بۆکان، لەلایەن بەرپرسانی ئەو شارەدارییەوە کرد.
پاش چوار ڕۆژ لە هەوڵەکانی بنەماڵە و دانیشتووانی گوندی "نێروانـ"ـی شاری بانە بۆ دۆزینەوەی تەرمی "دانا ساڵح‌پوور" خەڵکی ئەو گوندە، هێشتا تەرمەکە نەدۆزراوەتەوە.
ڕۆژی شەممە ٧ی ڕەشەمە، هاووڵاتییەکی کورد بە ناوی "مێقداد (کاردۆخ) حەسەن‌نژاد" خەڵکی شاری سەقز، بە دانانی بارمتە لە زیندانی ئەو شارە ئازاد کرا.
ڕێبوارعەبدوڵلاهی چالاکی کرێکاریی خەڵکی شاری سنە، هەروا لە گرتنگەی ئیدارەی ئیتلاعاتی ئەو شارە دەسبەسەرە.
لە چارەنووسی شەش هاووڵاتیی کورد بە ناوەکانی "یووسف عومەر‌پوور، موراد مامەڕەش، ئەیووب حەدیسی، ڕەحمان خدمەتگوزار، عەلی عومەر‌پوور و فەریاد شیلان" خەڵکی شاری پیرانشار پاش دەسبەسەرکرانیان، زانیارییەکی ئەوتۆ لەبەر دەستدا نییە.
ئێوارەی ڕۆژی هەینی ٦ی ڕەشەمە، هاووڵاتییەکی کورد بە ناوی "سەعدی پیران" تەمەن ٤٠ ساڵ خەڵکی گوندی "کەریم‌ئاوا"ی شاری بانە، بەهۆی تەقەی هێزە نیزامییەکانی حکوومەت کوژرا.
هێزە ئەمنییەتییەکانی ئیتلاعاتی سپا داوای بڕی ٣٠٠ ملیۆن تمەن پارە لە بنەماڵەی "مێقداد حەسەن‌نژاد" بۆ ئازادکردنی کاتیی کوڕەکەیان دەکەن.
ڕۆژی پێنجشەممە ٥ی ڕەشەمە، شەعبان محەممەدی، ئەندامی ئەنجومەنی سێنفی مامۆستایانی کوردستان - مەریوان بە دانانی بارمتە لە زیندانی مەریوان ئازاد کرا.
ئاژانسی هەواڵدەریی کوردپا
