ڕۆژی پێنجشەممە ٢ی پووشپەڕ، "غەیاس نێعمەتی، بێهزاد قەوامی و ڕەزا تەهماسبی"، لە ئەندامانی ئەنجومەنی سێنفیی مامۆستایانی کوردستان- سنە و کەڵاتەرزان، بە دانانی بارمتە لە گرتنگە ئازاد کران.
سۆعدا خەدیرزادە، زیندانیی سیاسیی کوردی خەڵکی شاری پیرانشار کە ڕۆژی دووشەممە ٣٠ی جۆزەردان منداڵەکەی لە یەکێک لە نەخۆشخانەکانی ورمێ لەدایک ببوو، پاش ڕۆژێک لە نەشتەرگەریی سزارییەن، ڕۆژی سێشەممە ٣١ی جۆزەردان، بۆ زیندانی ورمێ گەڕێندرایەوە.
ڕۆژی پێنجشەممە ٢ی پووشپەڕ، جەلال قادری‌زاد زیندانیی سیاسیی کوردی خەڵکی شاری شنۆ، لە زیندانی ئەو شارە ئیزنی مەرەخەسیی پێ درا.
ڕۆژی چوارشەممە ١ی پووشپەڕ، سادق کەنعانی چالاکی سێنفیی مامۆستایانی سنە لەلایەن هێزە ئەمنییەتییەکانەوە دەسبەسەر کرا.
ڕۆژی چوارشەممە ٢٨ی مانگی بانەمەڕی ١٤٠١، حوکمی لە سێدارەدانی هاووڵاتییەکی تەمەن ٣٠ ساڵ بە ناوی "فەردین کەلەهویی"، لە زیندانی "دیزڵاوا"ی کرماشان جێبەجێ کرا.
ڕۆژی چوارشەممە ١ی پووشپەڕ، هاووڵاتییەکی کورد بە ناوی "ڕەحمەت ئابجامە" خەڵکی شاری مەهاباد، لەلایەن هێزە ئەمنییەتییەکانەوە دەسبەسەر کرا و بۆ شوێنێكی نادیار ڕاگوێزرا.
سەرلەبەیانیی ڕۆژی پێنجشەممە ٢ی پووشپەڕ، شەهریار نادری، چالاکی سێنفیی مامۆستایان و مامۆستای فیزیک لە قوتابخانەکانی کرماشان لەلایەن هێزە ئەمنییەتییەکانەوە دەسبەسەر کرا.
ڕۆژی سێشەممە ٣١ی جۆزەردان، کۆڵبەرێکی تەمەن ١٧ ساڵ بە ناوی "سوهەیب قەیتۆڵی" خەڵکی شاری جوانڕۆ لە سنووری نەوسوود لە لایەن هێزە نیزامییەکانی حکوومەتییەوە ئازار و ئەشکەنجە درا.
ڕۆژی چوارشەممە ١ی پووشپەڕ، کۆڵبەرێکی کورد بە ناوی "مەحموود شەمسی‌نژاد" خەڵکی گوندی "جۆڵاندێـ"ـی شاری سەوڵاوا بەهۆی تەقەی هێزە نیزامییەکان لە سنووری نەوسوود پێکرا.
ڕۆژی دووشەممە ٣٠ی جۆزەردان، هاووڵاتییەکی کورد بە ناوی "خالید قوربانی" تەمەن ٢٦ ساڵ کوڕی یووسف لە زیندانی سنە بۆ زیندانی کامێران ڕاگوێزرا.
ئاژانسی هەواڵدەریی کوردپا
