سەرلەبەیانیی ڕۆژی سێشەممە، ٢٧ی پووشپەڕ، حوکمی لەسێدارەدرانی زیندانییەک بە ناوی "سەعید ئەڵماسی"، خەڵکی هەرسین، سەر بە پارێزگای کرماشان، لە زیندانی ناوەندیی هەمەدان، جێبەجێ کرا.
سەرەڕای تێپەڕبوونی ١٨ ڕۆژ لە دەسبەسەرکرانی سامان پاشایی، خاوەنی میداڵی جیهانیی کوشتیی فەرەنگی و خەڵکی سەقز، هیچ زانیارییەک لەمەڕ چارەنووسی ناوبراو لەبەر دەستدا نییە.
ڕۆژی یەکشەممە، ٢٥ی پووشپەڕ، هاووڵاتییەک بە ناوی "میلاد مورشدی"، تەمەن ٢٨ ساڵ و خەڵکی بەشی کارزان، سەر بە شاری سیروان، لە پارێزگای ئیلام، لەلایەن ناوەندە ئەمنییەتییەکانەوە دەسبەسەر کرا و بۆ شوێنێکی نادیار ڕاگوێزرا.
کەماڵ کەریمی، شادمان عەبدی و خەبات مەحموودی، لە چالاکانی کرێکاریی خەڵکی سنە، لەلایەن دادگای ئینقلابی ئەم شارەوە بە زیندان مەحکووم کراون و حوکمەکەیان هەڵپەسێردراوە.
سەرلەبەیانیی ڕۆژی سێشەممە، ٢٧ی پووشپەڕ، حوکمی لەسێدارەدرانی زیندانییەک بە ناوی "حەبیبوڵڵا ئیلخانی"، خەڵکی شاری نۆدشە، سەر بە پاوە، لە زیندانی دێزڵاوای کرماشان جێبەجێ کرا.
لە ماوەی ڕۆژانی ڕابردوودا، مێرمنداڵێکی تەمەن ١٤ ساڵ، بە ناوی "موحسن شابۆیی"، کوڕی حوسێن و خەڵکی گوندی "شاوانێ"، سەر بە شاری شنۆ، لەلایەن هێزە ئەمنییەتییەکانەوە دەسبەسەر کرا.
ڕۆژی یەکشەممە، ٢٥ی پووشپەڕ، ڕەزا خۆش‌نەزەر، هونەرمەندی کوردی خەڵکی بۆکان، لەلایەن هێزە ئەمنییەتییەکانەوە دەسبەسەر کرا و بۆ شوێنێکی نادیار ڕاگوێزرا.
شەوی دووشەممە، ٢٦ی پووشپەڕ، هاووڵاتییەک بە ناوی "بەیان فەرەجوڵڵاهی"، خەڵکی سنە، لەلایەن هێزە ئەمنییەتییەکانەوە دەسبەسەر کرا.
ڕۆژی یەکشەممە، ٢٥ی پووشپەڕ، کۆڵبەرێکی لاو بە ناوی "ئەشکان (پاشناو ناڕوون)"، بە تەقەی هیزە نیزامییەکانی حکوومەت لە سنووری "هەنگەژاڵ"ی بانە بریندار بوو.
ڕۆژی یەکشەممە، ٢٥ی پووشپەڕ، موحسن جەوادی‌فەر و شەفیع ئەزیر، دوو هاووڵاتیی خەڵکی "پەسوێ"ی پیرانشار، بە دانانی بارمتە و بە شێوەی کاتی، هەتا کۆتاییهاتنی قۆناغەکانی دادڕەسی، لە گرتنگەی ئیدارەی ئیتلاعاتی ورمێ ئازاد کران.
ئاژانسی هەواڵدەریی کوردپا
