Sibehê roja, Sêşemî 19ê Xezelwera 1405an a Rojî, biryara îdama «Erşad Ebbasî», ciwanekî Kurd ê xelkê gundê «Ziyaret Temirxan» a girêdayî navçeya Sêlasa Bawecanî ya parêzgeha Kirmaşanê, li girtîgeha navendî ya Dêzilava ya Kirmaşanê hate cîbicîkirin.

«Erşad Ebbasî» nêzî 2 salan beriya niha bi tohmeta «kuştina bizanebûn» ji aliyê hêzên polîsê ve hatibû binçavkirin û piştre ji aliyê dezgeha dadweriyê ve bi îdamê hatibû cezakirin. Di mehên borî de, biryara îdama wî hate pejirandin û malbata mexdûr jî razî nebû. Wî berî cîbicîkirina biryarê, di têkiliyeke telefonî de bi diya xwe re, ku vîdyoya wê di tora civakî de hatiye weşandin, ji malbata xwe xwestibû ku lê bibexşînin.

«Erşad Ebbasî» kurê Şebnem Behramî û Salih Ebbasî û yek ji endamên eşîra «Alî» ya êla «Babacanî» bû.

Heta dema amadekirina vê nûçeyê, cîbicîkirina biryara îdama vê girtiyê ji aliyê medyayên navxweyî yên Îranê an jî çavkaniyên fermî ve nehatiye ragihandin.

Di çarçoveya cezayê «qesas» de di yasayên Komara Îslamî ya Îranê de, hemû cureyên «kuştina bi zanebûn» tenê xwedî yek cure ceza ne, ew jî «qesasa canê» ye. Faktorên wekî berevaniya rewa, pevçûna bêyî niyet, şert û mercên çêbûna sûcê, motîvasyona tawanbar an jî rewşa wî ya derûnî û civakî, di bingehê cezakirinê de bandoreke diyarker nînin.

Cudahî nekirina di navbera cureyên cihê yên kuştinê de, bêyî berçavgirtina asta giranî, sivikî û motîvasyona pêkanîna sûcê, ku di dawiyê de dikare bibe sedema derxistina biryara îdamê, ji aliyekî ve, û radestkirina mafê standina jiyanê ji destê kesan bi weliyên xwînê re ji aliyê din ve, bi pabendiyên navneteweyî yên Îranê yên di çarçoveya xalan 6 û 14 yên Peymana Navneteweyî ya Mafên Sivîl û Siyasî de, bi taybetî mafê jiyanê û mafê dadweriya dadmend, di nav nakokiyê de ye.

Herwiha, ev pêkhate bi erkên desthilatdariyê yên ku di madeyên 22 û 156 yên Destûra Bingehîn a Komara Îslamî ya Îranê de hatine destnîşankirin, di warê parastina ewlehiya jiyana kesan û pêkanîna dadmendiya giştî de jî cihê lêhizkirinê ye.

Ji ber ku cîbicîkirina biryara îdama Erşad Ebbasî heta dema weşandina vê raporê ji aliyê tu yek ji medyayên navxweyî an çavkaniyên fermî ve nehatiye ragihandin, ev veşartin û nebûna zelaliyê, ji bilî ku derfeta çavdêriya giştî û piştrastkirina pêvajoya dadweriyê ji holê radike, girîngiya reformên bingehîn ên hiqûqî di warê dabeşkirina sûcên ku dibin sedema kuştinê û ji nû ve nirxandina avahiya heyî ya qesasa canê, ji her demê zêdetir derdixe pêş.