ڕۆژی یەکشەممە، ١٧ی بانەمەڕ، دوو هاووڵاتیی کورد بە ناوەکانی "پەیمان ئەحمەدیان" و "مەنووچێهر ڕەزایی"، خەڵکی دیواندەرە، لەلایەن هیزە ئەمنییەتییەکانەوە دەسبەسەر کران و بۆ شوێنێکی نادیار ڕاگوێزران.
ڕۆژی چوارشەممە ٢٠ی بانەمەڕ، هاووڵاتییەکی کورد بە ناوی "محەممەد عەزیزی" لە دەوروبەری گوندی "دۆڵەبی" سەر بە شاری سەردەشت، بە تەقەی هێزە نیزامییەکانی حکوومەت بریندار بوو.
ڕۆژی پێنجشەممە ٢١ی بانەمەڕ، کۆڵبەرێک بە ناوی "ئاکام محەممەدزادە"، تەمەن ٢٧ ساڵ و خەڵکی بۆکان، بە تەقەی هێزە نیزامییەکانی حکووومەت لە سنووری "هەنگەژاڵ"ی بانە بریندار بوو.
ڕۆژی پێنجشەممە، ٢١ی بانەمەڕ، ئاروین نیکپەی، هاووڵاتیی خەڵکی گوندی "نێ" سەر بە شاری مەریوان، لە گرتنگەی ئیداری ئیتلاعاتی مەریوانەوە بۆ زیندانی ئەم شارە ڕاگوێزرا.
ڕۆژی چوارشەممە ٢٠ی بانەمەڕ، کۆڵبەرێک بە ناوی "زەکەریا عەبدی"، خەڵكی سەلاسی باوەجانی بەهۆی بەربوونەوە لە بەرزایی لە سنووری نەوسوود بریندار بوو.
سەرلەبەیانیی ڕۆژی چوارشەممە ٢٠ی بانەمەڕ، حوکمی لەسێدارەدرانی زیندانییەک بە ناوی "محەممەدسابیر پەیامیان"، تەمەن ٣٤ ساڵ، خەڵکی شاباد لە زیندانی دێزڵاوای کرماشان جێبەجێ کرا.
ڕۆژی چوارشەممە ٢٠ی بانەمەڕ، مامۆستا سەید جەلال ئەکبەری، پێشنوێژی گوندی "دەگاگا" سەر بە شاری سەوڵاوا لەلایەن دادگای تایبەتی ڕۆحانییەتی هەمەدانەوە بە دوو ساڵ زیندانی تەعلیقی مەحکووم کرا.
ئەیووب عەبدوڵلاهی، خۆپیشاندەری خەڵکی سەقز ڕۆژی ٢٦ی خەرمانانی ١٤٠١، بە تەقەی هێزە سەرکوتکەرەکان پێکرا و چاوی ڕاستی بریندار بوو و بەگشتی بینایی ئەم چاوەی لەدەست داوە.
شەوی دووشەممە ١٨ی بانەمەڕ، سامان دەرویشی، زیندانیی خەڵکی هەرسین سەر بە پارێزگای کرماشان، لەژێر ئەشکەنجەی مەئموورەکانی زیندانی تارانی گەورەدا گیانی لەدەست دا.
ڕۆژی سێشەممە ١٩ی بانەمەڕ، فاتمە مەقسوودی، دایکی ئیدریس فەقیهی، لە ئەندامانی یەکێک لە حیزبە کوردییەکانی ئۆپۆزسیۆنی حکوومەتی ئێران، پاش چەند ڕۆژ کۆبوونەوەی ناڕەزایەتی لە بەردەم بینای ئیتلاعاتی سپای ورمێ دەسبەسەر کرا.
ئاژانسی هەواڵدەریی کوردپا
