مافخوازیی بنەماڵەی مێحراب عەبدوڵڵازادە بەندکراوی سیاسیی مەحکووم بە سێدارە؛ فریامان کەون، مێحراب بێتاوانە
٣ی بەفرانباری ۱۴۰۴؛ بنەماڵەی مێحراب عەبدوڵڵازادە، بەندکراوی سیاسیی کە تازەیی حوکمی سێدارەکەی لە دیوانی باڵای وڵاتدا پشتڕاست کراوەتەوە و مەترسیی جێبەجێکرانی حوکمی منداڵەکەیان زۆر بووە، لە پەیامێکی ڤیدیۆییدا بەتوندی داوای یارمەتی لە ناوەندە مافی مرۆییەکان و بەرپرسانی جیهان کردووە. ئەوان خوازیاری ڕاگرتنی خێرای جێبەجێکرانی حوکمی لەسێدارەدان و پێداچوونەوەی دۆسییەی کوڕەکەیان و براکەیان لە ڕەوتێکی دادوەریی دادپەروەرانە و ڕوونن. باوک، دایک و برای مێحراب عەبدوڵڵازادە جەختیان لەسەر بێتاوانیی ناوبراو کردەوە و وێڕای باسکردن لە دۆخی دژوار و قەیراناویی ناوبراو، باسیان لە ستەمێک کرد کە لە ماوەی دەسبەسەرکران و پێڕاگەیشتن بە دۆسییەکەیدا دژی ناوبراو، ڕووی داوە.
ئەم بنەماڵەیە لە پەیامەکانی خۆیاندا ئاماژە بە نادادپەروەری لە ڕەوتی دادڕەسیی مێحرابدا کردووە و جەختیان لەسەر دەستێوەردانی خێرای ناوەندە نێونەتەوەییەکان بۆ پێشگرتن لە جێبەجێکرانی ئەم حوکمە نادادپەروەرانەیە کردووە. ئەوان جەختیان لەسەر ئەشکەنجەی جەستەیی و دەروونیی مێحراب، نەبوونی بەڵگەی باوەڕپێکراو دژی ناوبراو، گوشارە دادوەرییەکان و ناچارکردنی بە دانپێدانانی زۆرەملێ کردووە. داواکاریی ئەم بنەماڵەیە تەنیا ڕاوەستاندنی حوکمی سێدارە نییە، بەڵکوو ئەوان داوایان لە سیستمی دادوەری ئەوەیە کە دۆسییەی مێحراب بەشیوەی دادپەروەرانە و بەپێی بەڵگەی ڕاستەقینە بێت.
کوردپا لە ٢٩ی سەرماوەزی ١٤٠٤ بڵاوی کردەوە؛ لقی ٩ی دیوانی باڵای وڵات حوکمی سێدارەی مێحراب عەبدوڵڵازادەی پشتڕاست کردەوە و مەترسیی جێبەجێکرانی حوکمەکەی زۆرە. مێحراب کە لە بەندیخانەی ناوەندیی ورمێیە، لە دادگاییەکی نادادپەروەرانەدا و لەژێر ئەشکەنجە و سەرەڕای هەبوونی پارادۆکسە ئاشکراکان لە دۆسییەکەی، بە تۆمەتی "افساد فیالارض" بە لە سێدراەدران سزا درا.
بنەماڵەی مێحراب بە هاوارێک لە ڕووی ناچاری و ئازارەوە، داوایان لە ویژدانە بەئاگاکان، ناوەندە مافی مرۆییەکان و هەموو خەڵکی جیهان کرد کە بۆ ڕزگارکردنی گیانی ئەم لاوە بێتاوانە یارمەتیدەریان بن.
دەقی نامەکانی دایک و باوکی مێحراب لە بەشی فارسیی کوردپادا بڵاو کراوەتەوە.
