بەردەوامیی دەسبەسەرکران و ناڕوونیی چارەنووسی خەبات ئیراندووست
سەرەڕای تێپەڕبوونی دوو حەفتە لە دەسبەسەرکرانی خەبات ئیراندووست، هاووڵاتیی خەڵکی بۆکان، سەبارەت بە چارەنووس و شوێنی ڕاگیرانی ناوبراو زانیارییەک لەبەر دەستدا نییە.
بە وتەی سەرچاوەیەکی ئاگادار، ئەم هاووڵاتییە کوردە لە ماوەی دەسبەسەکرانیدا لە دەسپێڕاگەیشتن بە پارێزەر، پێوەندیی تلفۆنی و چاوپێکەوتن لەگەڵ بنەماڵەکەی بێبەری بووە.
ئەم سەرچاوە ئاگادارە ڕایگەیاند: تاکوو ئێستا بەدواداچوونەکانی بنەماڵەی ئەم هاووڵاتییە بە مەبەستی ئاگاداربوونەوە لە چارەنووس و شوێنی ڕاگیرانی ناوبراو بێ ئاکام بووە.
خەبات ئیراندووست ڕۆژی چوارشەممە ١١ی ڕەزبەری ١٤٠٣، بە بێ بەڵگەی یاسایی لە شوێنی کارەکەی خۆیدا و لەلایەن هێزە ئەمنییەتییەکانەوە دەسبەسەر کرا و بۆ شوێنێکی نادیار ڕاگوێزرا.
خەبات ئیراندووست تەمەن ٤٣ ساڵ، کوڕی عومەر، خێزاندارە و منداڵێکی هەیە.
تاکوو ئێستا سەبارەت بە هۆکاری دەسبەسەرکران و تۆمەتە وەپاڵدراوەکان دژی ئەم هاووڵاتییە کوردە زانیارییەکی ورد لەبەر دەستدا نییە.
