مەهاباد؛ هاووڵاتییەک بە تەقەی هێزە ئینتیزامییەکان گیانی لەدەست دا
11:11 - 4 گەلاوێژ 2724
![](/content/upload/1/news-kurdpa/6602.jpg)
سەرلەبەیانیی ڕۆژی چوارشەممە ٣ی گەلاوێژی ١٤٠٣، هاووڵاتییەکی کورد بە ناوی "ئەحمەد تێرمەن" خەڵکی مەهاباد، بە تەقەی هێزە ئینتیزامییەکان گیانی لەدەست دا.
بە وتەی سەرچاوەیەکی ئاگادار، هێزە ئینتیزامییەکان بە مەبەستی دەسبەسەرکرانی ئەم هاووڵاتییە هێرشیان کردووەتە سەر ماڵەکەی لە گەڕەکی "باغی سیسە"ی مەهاباد و لە کاتی ڕاوەدوونانی ناوبراودا تەقەیان لێ کردووە.
ئەم سەرچاوە ئاگادارە ڕایگەیاند: ئەحمەد تێرمەن بە هۆی ئەوەی کە فیشەک بەر سەری کەوتووە، دەسبەجێ گیانی لەدەست داوە.
هەتا کاتی بڵاوبوونەوەی ئەم هەواڵە، تەرمی ئەم هاووڵاتییە کوردە ڕادەستی بنەماڵەکەی نەکراوە.