ئیسماعیل مەعرووفی، مامۆستای خانەنشینکراوی قوتابخانەکانی پیرانشار بە دانانی بارمتە ئازاد کرا
ڕۆژی پێنجشەممە ٢٨ی پووشپەڕی ١٤٠٣، ئیسماعیل مەعرووفی، مامۆستای خانەنشینکراوی قوتابخانەکانی پیرانشار بە دانانی بارمتەی یەک میلیارد تمەنی و بە شێوەی کاتی لە بەندیخانەی نەغەدە ئازاد کرا.
ئەم مامۆستایە بە مەبەستی لێپرسینەوە بۆ گرتنگەیەکی ئەمنییەتیی ورمێ ڕاگوێزراوە و پاش کۆتاییهاتنی قۆناغەکانی لێپرسینەوەکەی ڕەوانەی بەندیخانەی نەغەدە کراوە.
شەوی سێشەممە ١٩ی پووشپەڕی ١٤٠٣، هێزەکانی ئیتلاعاتی پیرانشار، کاتژمێر ١١ی شەو هێرشیان کردووەتە سەر ماڵی ئەم مامۆستایە و پاش پشکنینی ماڵەکەی و دەستداگرتن بەسەر مۆبایلەکەیدا، ئەم مامۆستا خانەنشینکراوەیان بە بێڕێزیکردنەوە دەسبەسەر کردووە.
تاکوو ئێستا سەبارەت بە هۆکاری دەسبەسەرکران و تۆمەتە وەپاڵدراوەکان دژی ئیسماعیل مەعرووفی زانیارییەک لەبەر دەستدا نییە.
شایانی ئاماژەیە کە ئیسماعیل مەعرووفی زیاتر لە ٣٠ ساڵ پێشینەی مامۆستایەتیی لە قوتابخانەکانی پیرانشار و گوندەکانی دەوروبەری هەیە.
