مەریوان؛ دەسبەسەرکرانی ئیدریس دادڕەس لەلایەن هێزە ئەمنییەتییەکانەوە
سەرلەبەیانیی ڕۆژی سێشەممە ٥ی پووشپەڕی ١٤٠٣، هاووڵاتییەکی کورد بە ناوی "ئیدریس دادڕەس" خەڵکی گوندی "سەردۆش" و دانیشتووی مەریوان، لەلایەن هێزە ئەمنییەتییەکانەوە دەسبەسەر کرا و بۆ شوێنێکی نادیار ڕاگوێزرا.
بە وتەی سەرچاوەیەکی ئاگادار، هێزە ئەمنییەتییەکان بە بێ بەڵگەی یاسایی هێرشیان کردووەتە سەر ماڵی ئەم هاووڵاتییە لە مەیدانی "جەهاد"ی مەریوان و دەسبەسەریان کردووە.
ئەم سەرچاوە ئاگادارە ڕایگەیاند: هێزە ئەمنییەتییەکان لە کاتی دەسبەسەرکردنی ئەم هاووڵاتییە کوردەدا، لە پێش چاوی ئەندامانی بنەماڵەکەی لێیان داوە.
ئەم سەرچاوە ئاگادارە وتی: هێزە ئەمنییەتییەکان مۆبایلی ئەم هاووڵاتییەیان لەگەڵ خۆیان بردووە.
ئیدریس دادڕەس، کوڕی سابیر، خێزاندارە و ٥ منداڵی هەیە.
هەتا کاتی بڵاوبوونەوەی ئەم هەواڵە، سەبارەت بە هۆکاری دەسبەسەرکران و تۆمەتە وەپاڵدراوەکان دژی ئیدریس دادڕەس، زانیارییەک لەبەر دەستدا نییە.
