پیرانشار؛ بانگهێشت و هەڕەشە لە حەسەن دەرئوفتادە، بۆ پێشگرتن لە بەڕێوەبردنی ڕێوڕەسم و چالاکی لە سۆشیاڵ میدیا لە ساڵوەگەڕی قەتڵی حکوومەتیی کوڕەکەیدا
ڕۆژی یەکشەممە، ٧ی خەزەڵوەری ١٤٠٢، حەسەن دەرئوفتادە، باوکی کۆمار دەرئوفتادە لە گیانلەدەستداوانی بزووتنەوەی ژن، ژیان، ئازادی لە پیرانشار، بانگهێشتی ئیتلاعاتی ئەم شارە کرا و لێپرسینەوە و هەڕەشەی لێ کرا.
بە وتەی سەرچاوەیەکی ئاگاداری کوردپا، هێزە ئەمنییەتییەکان هەڕەشەیان لە حەسەن دەرئوفتادە کردووە کە ئیزنی بەڕێوەبردنی ڕێوڕەسم و چالاکی لە سۆشیاڵ میدیای بە بۆنەی ساڵوەگەڕی قەتڵی حکوومەتیی کوڕەکەی نییە.
ئەم سەرچاوە ئاگادارە ڕایگەیاند: حەسەن دەرئوفتادە پاش دوو کاتژمێر لێپرسینەوە و هەروەها هەڕەشە، ئازاد کراوە.
ڕۆژی دووشەممە، ٣٠ی گەلاوێژی ١٤٠٢، حەسەن دەرئوفتادە و ماردین دەرئوفتادە بانگهێشتی ئیتلاعاتی پیرانشار کران و دوو کاتژمێر لەلایەن هێزە ئەمنییەتییەکانەوە لێپرسینەوەیان لێ کرا. هێزە ئەمنییەتییەکان هەڕەشەیان لە بنەماڵەی دەرئوفتادە کردبوو کە لە ساڵوەگەڕی ناڕەزایەتییەکانی ژن، ژیان، ئازادیدا لە "بەشداریکردن لە ڕێوڕەسمەکان" و "چالاکی لە سۆشیاڵ میدیا" خۆ ببوێرن.
حەسەن دەرئوفتادە، باوکی کۆمار دەرئوفتادە بە هۆی قسەکردن و داواکردنی مافی کوڕەکەی، چەندین جار بانگهێشت و دەسبەسەر کراوە و ڕۆژی ٢٥ی گەلاوێژی ١٤٠٢ش، هێزە سەرکوتکەرەکان بە بانگهێشتکردن، هەڕەشە و گوشار خستنەسەر بنەماڵەکەی، پێشیان بە بەڕێوەچوونی ڕێوڕەسمی لەدایکبوونی کۆمار گرت.
هێزە ئەمنییەتییەکان لە ڕۆژی لەدایکبوونی کۆماردا لە نیوەی ڕێگا، بە وەرگرتنی کەیک و کەلوپەلەکانی دیکە پێشیان بە چوونی بنەماڵەی دەرئوفتادە بۆ سەر مەزاری کۆمار گرت و ناچار بە گەڕانەوە بۆ ماڵەوەیان کردن.
کۆمار دەرئوفتادە شەوی ٨ی خەزەلوەری ١٤٠١، بە تەقەی هێزە سەرکوتکەرەکان لە مەودای نزیکەوە گیانی لەدەست دا و تەرمەکەی ڕۆژی دووشەممە، ٩ی خەزەڵوەری ١٤٠١ لە گوندی "زێوکە"ی پیرانشار بە خاک ئەسپێردرا.
