کرێکارێکی بانەیی بەهۆی تەزووی کارەباوە گیانی لەدەست دا

ڕۆژی سێشەممە، ١٣ی ڕەشەمە، کرێکارێکی کورد بە ناوی "خالید ڕەحیمزادە" تەمەن ٣٢ ساڵ، بەهۆی کارەباگرتوویی لە کاتی کارکردندا گیانی لەدەست دا.

ئەو کرێکارە کوردە کرێکاری "ئاڵماتۆڕبەندی" بووە و لە بینایەک خەریکی کار بووە کە تووشی ئەو ڕووداوە هاتبوو.

"خالید ڕەحیمزادە" خەڵکی گوندی "بڵەسەنـ"ـی بانە و خێزاندار و باوکی دوو منداڵە.

مانگی خەزەڵوەری ئەمساڵ، ڕێکخراوی پزیشکی یاسایی ئێران لە ڕاپۆرتێکدا، ڕێژەی گیانلەدەستدانی کرێکاران لە ئێران لە ٦ مانگی سەرەتایی ئەمساڵی ٨٩٨ کەس ڕاگەیاند کە بەنیسبەت ساڵی ڕابردوو (٩٧)، ٧.٥ لەسەد بەرزبوونەوەی بەخۆوە بینیوە و هەروەها لەو ڕێژەیە ١٤٠ کەس بەهۆی کارەباگرتووییەوە گیانیان لەدەست داوە.