کاسبکارێکی سەقزی پاش ٨ ساڵ بەربەرەکانێ لەگەڵ "قەتعی نوخاعـ"ـی گیانی لەدەست دا

حەوتووی ڕابردوو، کاسبکارێکی کورد بە ناوی "ناسێح شابازی" خەڵکی سەقز کە بە تەقەی یەکێک لە دەستوپەیوەندییەکانی حکوومەتی ئێران، تووشی "قەتعی نوخاع" ببوو، پاش ٨ ساڵ گیانی لەدەست دا.

سەرچاوەیەکی ئاگادار لەو بارەیەوە بە ئاژانسی کوردپای ڕاگەیاند: "ئەو کاسبکارە کوردە لە گوندی ئێرانشا سەر بە ناوەندی تیلەکۆی سەقز، لەلایەن یەکێک لە دەستوپەیوەندییەکانی حکوومەتەوە تەقەی لێ کرابوو و بەسەختی بریندار ببوو".

ئەو سەرچاوەیە هەروەها ئەوەشی خستەڕوو، ئەو کاسبکارە کوردە، ماوەی ٦ مانگ بوو کە بە تەواوەتی توانای جووڵانی نەمابوو و ڕۆژی دووشەممەی ڕابردوو گیانی لەدەست دا.

ئەو سەرچاوەیە زیادی کرد: "فیروزی کە تەقەی لەو کاسبکارە کوردە کردبوو، لەو پەیوەندییەدا نەتەنیا دادگایی نەکرا، بەڵکوو دەوڵەت بڕە پارەیەکی وەکوو دییە بە بنەماڵەی ئەو کاسبکارە دابوو و لە ماوەی ئەو ٨ ساڵەدا، هەموو تێچووی نەخۆشخانە و دەوا و دەرمان لەسەر ئەو بنەماڵەیە بووە".

پێشتر "محەممەد ساڵح نیکبەخت" لە وتووێژێکدا لەگەڵ ئاژانسی کوردپا سەبارەت بە تەقەکردن لە ماشینی کاسبکاران لەلایەن هێزە ئینتزامییەکانەوە، ڕایگەیاند: "ئەگەر کەسێک ماشینی پێ بێت، دەبێ لە سەرەتادا تەقە لە تەگەری ماشینەکە بکرێت،کە ئەمە دەبێتە هۆی ڕاوەستانی ماشینەکە و لە ئەنجامدا گرتنی شۆفیرەکە، بەڵام لە زۆربەی حاڵەتەکاندا هیچکام لە ماددە یاساییەکان ڕەچاو ناکرێت و لە یەکەم حاڵەتدا تەقە لە شۆفیرەکان دەکەن".