دەسبەسەریی چالاکێکی ژینگەیی کورد درێژەی هەیە

چالاکێکی ژینگەیی کورد بە ناوی "خەبات مەفاخری" خەڵکی شاری سنە، لە گرتنگەکانی ئیدارەی ئیتلاعاتی ئەو شارە، لە ژێر لێکۆڵێنەوە دایە.

بڕیاری دەسبەسەرکردنی ئەو چالاکە ژینگەییە دوو جار درێژە کراوەتەوە و و ناوبراو لە ماوەی دەسبەسەرکرانیدا، لە چاوپێکەوتن لەگەڵ بنەماڵەکەی و دەسپێڕاگەیشتن بە پارێزەر بێبەری کراوە.

هەتا ئێستا بەدواچوونی بنەماڵەی ئەو چالاکە کوردە، بۆ ئاگاداربوون لە هۆکاری گیران و تۆمەتی دژی ناوبراو، بێئاکام ماوەتەوە.

ڕۆژی پێنجشەممە ٦ی خەرمانان، "خەبات مەفاخری" چالاکی ژینگەیی خەڵکی شاری سنە، لەلایەن هێزە ئەمنییەتییەکانەوە دەسبەسەر کرابوو و هێزە ئەمنییەتییەکان، لە کاتی دەسبەسەرکردنی ئەو چالاکە ژینگەییە ناوبراویان ئازار و ئەشکەنجە دابوو.

هێزە ئەمنییەتییەکان بەبێ بەڵگەی قەزایی هێرشیان کردووەتە سەر ماڵی ئەو چالاکە ژینگەیەی و دەستیان بە پشکنینی ماڵەکەی کردووە و هێندێک کەرەستەی شەخسیی ناوبرایان لەگەڵ خۆیان بردووە.

خەبات مەفاخری ئەندامی کۆمەڵەی سەوزی کوردستانە.