ڕۆژی شەممە ٢٨ی پووشپەڕ، هاووڵاتییەکی کورد بە ناوی "ڕەزا قوربانی" کوڕی "ئەسعەد"، تەمەن ٣٢ ساڵ و خەڵکی پیرانشار، لەلایەن هێزە ئەمنییەتییەکانەوە دەسبەسەر کرا و بۆ شوێنێکی نادیار ڕاگوێزرا.
هاووڵاتییەکی کوردی خەڵکی کامیاران بە ناوی "زانکۆ قوربانی" کوڕی "ئەنوەر" خەڵکی گوندی "بزوەش" و دانیشتووی شارەکی "تروەڕێز" کە لە یەکێک لە پادگانەکانی تەورێز سەرباز بووە، دەسبەسەر کراوە.
هاووڵاتییەکی کورد بە ناوی "فەتاح فروهەر" خەڵکی شاری پیرانشار، بۆ لێپرسینەوە ڕەوانەی گرتنگەی ئیدارەی ئیتلاعاتی ورمێ کرا.
ڕۆژی شەممە ٢٨ی پووشپەڕ، شوانێک بە ناوی "ڕەسووڵ باکەند" کوڕی "عەبدوڵڵا" خەڵکی گوندی "بازرگان" سەر بە شاری پیرانشار، بەهۆی بەرکەوتنی گولـلە خومپارەی سپای پاسداران گیانی لەدەست دا.
ڕۆژی شەممە ٢٨ی پووشپەڕ، دارستانەکانی نیوان گوندەکانی "ڕوار، زۆم و ئەسپەرێز" ئاگریان تێبەردرا و لەلایەن دانیشتووانی ئەو گوندانەوە کۆنترۆڵ کرا.
مانگی خاکەلێوەی ئەمساڵ، چوار هاووڵاتیی کورد بە ناوەکانی "ئارمان حوسێن‌زادە تەمەن ٢٠ ساڵ، "بەهمەن ڕەحیمی" تەمەن ١٩ ساڵ، "میلاد حوسێنی" تەمەن ١٩ ساڵ و "سینا عەبدوڵڵاهی" تەمەن ١٧ ساڵ" خەڵکی شاری بانە لە دادگای ئینقلابی سەقز دادگایی کران.
ڕۆژی سێشەممە ٢٤ی پووشپەڕ، ژنێکی لاو بە ناوی "شیوا قوبادی" خەڵکی ڕوانسەر، کۆتایی بە ژیانی خۆی هێنا.
ئەمڕۆ شەممە ٢٨ی پووشپەڕ، "کەماڵ حەسەن ڕەمەزان"، زیندانیی سیاسیی مەحکووم بە ئێعدام لە زیندانی ورمێ، بۆ گرتنگەی ئیدارەی ئیتلاعاتی سپای پاسداران ڕاگوێزرا.
باری تەندروستیی یەکێک لە دەروێشەکانی تەریقەتی قادری بە ناوی "حەسەن غوڵامی" خەڵکی شاری مەریوان کە بە تەقەی هێزە نیزامییەکانی حکوومەت لە خاڵی سنووریی باشماخ پێکرابوو، نالەبار ڕاگەیەندراوە.
ماڵپەڕی "مێرساد نیوز" نزیک لە سپای پاسداران، لە زاری دادستێنی شاباد بڵاوی کردەوە کە چەند کەس لە وەڕێخەرانی (لیدر) بانگەشە بۆ کۆبوونەوەی ناڕەزایەتی لەو شارە لەلایەن هێزی ئیتلاعاتی سپای پاسدارانەوە دەسبەسەر کراون.
ئاژانسی هەواڵدەریی کوردپا
