هاووڵاتییەکی کورد بە ناوی "ناسر دالە"، کوڕی عوسمان، خەڵکی گوندی "زەنگاوێ" و دانیشتووی "شیناوێ"ی پیرانشار، سەرەڕای تێپەڕبوونی ٩ مانگ لە کاتی دەسبەسەرکرانی، ئێستاش لە زیندانی نەغەدە دەسبەسەرە و چارەنووسی ناڕوونە.
ڕۆژی شەممە ٣٠ی بانەمەڕ، جەلال تەپاک، هاووڵاتیی خەڵکی پیرانشار بە دانانی بارمتەی ٣ میلیارد و ٥٠٠ تمەنی بە شێوەی کاتی لە زیندانی نەغەدە ئازاد کرا.
ڕۆژی چوارشەممە ٢٧ی بانەمەڕ، دوو هاووڵاتیی کورد بە ناوەکانی "ئەحمەد غوڵامی" و "ڕەسووڵ عوبەیدی"، خەڵکی گوندی "سیوچ" سەر بە شاری بانە، بە دانانی بارمتە بە شێوەی کاتی لە زیندانی ئەم شارە ئازاد کران.
ڕۆژی هەینی ٢٩ی بانەمەڕ، ئێقباڵ شەعبانی، چالاکی کرێکاری خەڵکی سنە لەلایەن ناوەندە ئەمنییەتییەکانەوە دەسبەسەر کرا.
شەوی چوارشەممەی حەوتووی ڕابردوو، کچە خوێندکارێک بە ناوی "سەنا زارعی" تەمەن ٢١ ساڵ، خەڵکی گوندی "کوییک"ی ناوچەی سەرپێڵزەها، بە کتوپڕ لە خەوتنگەی زانکۆی ئازادی کرماشان گیانی لەدەست دا.
ڕۆژی پێنجشەممە ٢٨ی بانەمەڕ، بورهان سەعیدی، چالاکی کرێکاریی خەڵکی سنە، پاش بانگهێشتکران بۆ ئیدارەی ئیتلاعاتی ئەم شارە دەسبەسەر کرا.
ڕۆژی پێنجشەممە ٢٨ی بانەمەڕ، کۆڵبەرێک بە ناوی "حەبیب محەممەدی"، خەڵکی مەریوان، بە هۆی بەربوونەوە لە بەرزاییەکانی سنووری "تەتە"ی هەورامان بریندار بوو.
شەوی پێنجشەممە ٢٨ی بانەمەڕ، فارووق عەزیزی، کۆڵبەری خەڵکی گوندی "دربکە"ی پیرانشار لە نەخۆشخانەی "ئاشتی"ی سۆران لە هەرێمی کوردستانی عێراق، نەشتەرگەیی بۆ کرا.
شەوی چوارشەممە ٢٧ی بانەمەڕ، هاجەر سەعیدی، عەبدوڵڵا خەیرئابادی، کەماڵ کەریمی، شادمان عەبدی، حەبیبوڵڵا کەریمی، خەبات مەحموودی، سیروان مەحموودی و ئێقباڵ پیشکاری لە چالاکانی کرێکاریی سنە لەلایەن هێزە ئەمنییەتییەکانەوە دەسبەسەر کران.
سەرلەبەیانیی ڕۆژی پێنجشەممە ٢٨ی بانەمەڕ، حوکمی لەسێدارەدرانی دوو زیندانی بە ناوەکانی "جەمشید کەریمی" خەڵکی دێولان و دانیشتووی سنە و "مستەفا ساڵحی"، خەڵکی دزڵی سەر بە شاری سەوڵاوا لە زیندانی ناوەندیی سنە جێبەجێ کرا.
ئاژانسی هەواڵدەریی کوردپا
