ڕۆژی شەممە، ٦ی ڕەشەمە، محەممەدعوبەید حەقیقیان، فەرمانبەری پێشووی دادگوستەریی سنە بە دانانی بارمتەی ٥٠٠ میلیۆن تمەنی بەشێوەی کاتی تا کۆتاییهاتنی قۆناغەکانی دادڕەسی لە زیندانی ناوەندیی سنە ئازاد کراوە.
سەرلەبەیانیی ڕۆژی چوارشەممە ١٠ی ڕەشەمە، حوکمی لەسێدارەدرانی زیندانییەک بە ناوی "محەممەد دوستی نژاد"، تەمەن ٢٩ ساڵ، خەڵکی شاری هەرسین سەر بە پارێزگای کرماشان لە زیندانی ناوەندیی هەمەدان جێبەجێ کرا.
ڕۆژی سێشەممە، ٩ی ڕەشەمە، پوویا ڕۆستەمیپوور، تەمەن ٣٢ ساڵ و ڕاهێنەری فووتباڵ و دەرچووی بیووشیمیی زانکۆی ئازادی سنە، بە دانانی بارمتەی ٢ میلیارد تمەنی بە شێوەی کاتی، هەتا کۆتاییهاتنی قۆناغەکانی دادڕەسی ئازاد کرا.
ڕۆژی چوارشەممە، ١٠ی ڕەشەمە، دوو هاووڵاتیی کورد بە ناوەکانی "فەتاح بۆلەند گرامی" و "مانی بۆلەند گرامی"، خەڵکی گوندی "قازانسەر" و دانیشتووی بۆکان لەلایەن هێزە ئەمنیەتییەکانەوە دەسبەسەر کران.
ڕۆژی چوارشەممە، ١٠ی ڕەشەمە، محەممەد زەینیوەند، هاووڵاتیی خەڵکی دەڕەشاری ئیلام بە دانانی بارمتە بەشێوەی کاتی هەتا کۆتاییهاتنی قۆناغەکانی دادڕەسی لە زیندانی ماهپارە ئازاد کرا.
سەرلەبەیانیی ڕۆژی سێشەممە، ٩ی ڕەشەمە، حوکمی لەسێدارەدانی زیندانییەک بە ناوی "کەیۆمەرس سادقپوور"، خەڵکی شاری کرێند لە زیندانی دێزڵاوای کرماشان جێبەجێ کرا.
سەرەڕای تێپەڕینی دوو حەفتە بەسەر دەسبەسەرکرانی هاووڵاتییەکی کورد بە ناوی "بایەزید ڕاسخنیا" تەمەن ٤٢ ساڵ خەڵکی مەهاباد، زانیارییەک لەمەڕ چارەنووسی لەبەر دەستدا نییە.
ڕۆژی چوارشەممە ١٠ی ڕەشەمە، ئارمان مینبەری، کاراتەکای خەڵکی سنە بە دانانی بارمتەی ٣ میلیارد تمەنی بە شێوەی کاتی هەتا کاتی کۆتاییهاتنی قۆناغەکانی دادڕەسی لە گرتنگەی ئیدارەی ئیتلاعاتی ئەو شارە ئازاد کرا.
عەلی نەزەری و سەیدعەلی دەکەیی، لە چالاکانی مەدەنیی یارسان بانگهێشتی لقی ١ی لێپرسینەوەی دادسەرای گشتی و ئینقلابی شاری سەحنە کران.
سەیدئەمین عەباسی، سەیدسروش عەباسی و سەیدکەرەم عەباسی، لە چالاکانی مەدەنیی یارسان بە تۆمەتی "کۆبوونەوە و تەبانی بەمەبەستی ئەنجامدانی تاوان دژی ئەمنییەتی نێوخۆیی"، بانگهێشتی لقی ١ی لێپرسینەوەی دادسەرای گشتیی و ئینقلابی شاری سەحنە کران.
ئاژانسی هەواڵدەریی کوردپا
