کوژرانی لاوێکی کوردی دانیشتووی قەرچەکی تاران لەلایەن چەند تورکێکەوە
ڕۆژی پێنجشەممە ٢٩ی بانەمەڕ، لاوێکی تەمەن ٢٣ ساڵە بە ناوی "قاسم حەیدەری" کوڕی عەلی خەڵکی شاری ئابدانانی ئیلام و دانیشتووی قەرچەکی شاری تاران، لەلایەن چەند کەسێکی بە ڕەگەز تورکەوە کوژرا.
سەرچاوەیەکی ئاگادار لەوبارەیەوە بە ئاژانسی کوردپای ڕاگەیاند: "ئەو چەند کەسە بەهۆی دەمەقاڵێ لەگەڵ ئەو لاوە کوردە، بە چەقۆ هێرش دەکەنە سەری و لە بینایەکی سێ نهۆمی فڕێی دەدەنە خوارەوە".
ئەو سەرچاوەیە هەروەها ئەوەشی خستەڕوو: "قاسم حەیدەری دەسبەجێ گیانی لە دەست دەدات و پاش دەسبەسەرکردنی بکوژانی ئەو لاوە، ڕۆژی هەینی بکوژەکان ئازاد دەکرێن".
ئەو سەرچاوەیە هەروەها ڕایگەیاند: "بنەماڵەی ئەو هاووڵاتییە کوژراوە، تەرمی کوڕەکەیان ڕۆژی شەممە ٣١ی بانەمەڕ دەبنە بەردەم دادگوستەریی قەرچەک و کۆبوونەوەی ناڕەزایەتی بەڕێوە دەبەن و خوازیاری سزادانی بکوژەکانی کوڕەکەیان بوون".
ئەو سەرچاوەیە لە کۆتاییدا ڕایگەیاند: "بکوژەکانی قاسم حەیدەری بە دانی پارە ڕۆژی هەینی ٣٠ی بانەمەڕ، دوای کەمتر لە ٢٤ کاتژمێر لە دەسبەسەرکرانیان، ئازاد کراون".
