ژنێک و سێ پیاو لە پیرانشار لەلایەن هێزە ئەمنییەتییەکانەوە دەسبەسەر کران
ئێوارەی ڕۆژی شەممە ٢٧ی خاکەلێوە، چوار هاووڵاتیی کورد بە ناوەکانی "شارام بوورک، سەید ناسر حوسێنی، عومەر ئیبراهیم نادری و لەیلا ئیبراهیم نادری" کچی عومەر خەڵکی گوندی "سۆغانلوو"ی شاری پیرانشار لەلایەن هێزە ئەمنییەتییەکانەوە دەسبەسەر کران.
هێزە ئەمنییەتییەکان بە بێ بەڵگەی یاسایی ئەو چوار هاووڵاتییە کوردەیان دەسبەسەر و ئەوانیان بۆ لێپرسینەوە ڕەوانەی گرتنگەی ئیتلاعاتی سپای پیرانشار کردبوو.
بە وتەی سەرچاوەیەکی ئاگادار، ئەمڕۆ دووشەممە ٢٩ی خاکەلێوە، سەید "ناسر حوسێنی و عومەر ئیبراهیم نادری" باوکی "لەیلا ئیبراهیم نادری" بە لێوەرگرتنی بەڵێننامە ئازاد کراون.
ئەو سەرچاوەیە هەروەها ئەوەشی خستە ڕوو "شارام بوورک" پاش تەواوبوونی لێپرسینەوەکەی بۆ زیندانی نەغەدە ڕاگوێزراوە و "لەیلا ئیبراهیم نادری" بۆ بەندی ژنان لە زیندانی ورمێ، گوازتراوەتەوە.
هەتا کاتی بڵاوبوونەوەی ئەم هەواڵە لە هۆکاری دەسبەسەری و تۆمەتی وەپاڵدراو دژی ئەو چوار هاووڵاتییە زانیارییەک نییه.
