ڕاگەیەندراوی بەرەی یەکگرتووی کورد لەمەڕ لەسێدارەدانی حەیدەر قوربانی
بەرەی یەکگرتووی کورد لە ڕاگەیاندراوێکدا، لەسێدارەدانی "حەیدەر قوربانی" زیندانیی سیاسیی ئێعدام کراوی خەڵکی شاری کامیاران لە زیندانی سنەی، مەحکووم کرد.
لە بەشێکی ئەو ڕاگەیەندراوەدا هاتووە: "لە کاتێکدا کە کۆمەڵگە لەگەڵ قەیران و کێشەی جۆراوجۆر بەرەوڕوویە و هەر ڕۆژ کە تێدەپەرێ ئەو کێشە و قەیرانانە پەرە دەستێنی، وادێتە پێش چاو کە نیزامی زاڵ چاوی لە ئاستی هەموو ڕاستییەکان داخستووە و بە هەڵسوکەوت و سیاسەتە ناکارامەدەکانی لە ئاستی نێوخۆ و نێونەتەوەیی، خۆی بووەتە هۆی دروستکردنی قەیران و بەرهەمهێنانی کێشە و گرفت.
لە بەشێکی دیکەی ئەو ڕاگەیەندراوەدا هاتووە: "دۆخی نالەباری ئابووری و کێشەی بژێویی ژیان، مەودای چینایەتیی کەم وێنە، کەلێنی نێوان خەڵک و حکوومەت، پەرەسەندنی ناڕەزایەتیی سێنف و چین و توێژەکان، هەوڵدان بۆ سەرکوتی خەڵک و لەپێشگرتنی هەڵسوکەوتی توندوتیژییانە لەگەڵ ناڕازییەکان، دۆخێکی وەهای پێک هێناوە کە وڵاتی لەگەڵ مەترسی بەرەڕوو کردووەتەوە، بەڵام حکوومەت لە ئاستی ئەو قەیرانانە خۆی کوێر و کەڕ کردووە و نە دەنگێک دەبیستێ و لە گوێی لە ڕاستییەکان دەبێت".
بەرەی یەکگرتووی کورد کە بەردەوام پرسی ئاشتی ــ میللی و گۆڕینی هەڵسوکەوتی دەسەڵاتی لەپێش چاو گرتووە، بەڵام دەسەڵاتداران خەریكی بەرهەمهێنانی توندوتیژین و لەم دواییانەشدا، یەکێک لە زیندانییانی سیاسیی کوردیان بە ناوی "حەیدەر قوربانی" لە سێدارە دا.
بەرەی یەکگرتووی کورد هەروەها لەو بەیاننامەیەدا وتی: "ئەو دۆسیە "پڕ لە ناڕوونیـ "ـیە بووەتە هۆی ئەوەیکە زۆرێک لە کوردەکان ناڕەزایەتیی خۆیان بەنیسبەت ئەو حوکمە نادادپەروەرانەیە دەرببڕن".
بەرەی یەکگرتووی کورد وێڕای مەحکوومکردنی ڕەوتی دادگاییکردن و داسەپاندن و جێبەجێکردنی حوکمی لەسێدارەدانی "حەیدەر قوربانی" و نموونەگەلێک لەو چەشنە، هۆشداریی داوە و داوای لێکجیاکردنەوەی تۆمەتەوەپاڵدراوەکان دەکات.
دەقی تەواوی ئەو بەیاننامەیە، لە بەشی "فارسیـ"ـی ئاژانسی کوردپا هاتووە.
