چالاکێکی مەدەنیی کورد لە تاران بۆ جێبەجێ‌کردنی حوکمەکەی دەسبەسەر کرا
ڕۆژی یەکشەممە ١١ی جۆزەردان، چالاکێکی کورد بە ناوی "سەعید ئیقباڵی" خەڵکی کرماشان، پاش سەردانی لە لقی ١ی جێبەجێ‌کردنی تاوانەکانی کەیفەریی دادسەرای ئەمنییەتی تاران، بۆ تێپەڕاندنی ماوەی ٥ ساڵ زیندانییەکەی ڕەوانەی بەندی دابڕگەی زیندانی ئێڤین کرا.
ئەو چالاکە مەدەنییە کوردە، ڕێکەوتی ٢٤ی ڕەشەمەی ساڵی ٩٨، لەلایەن لقی ٣٦ی دادگای پێداچوونەوەی پارێزگای تاران بە تۆمەتی "کۆبوونەوە و تەبانی بە مەبەستی هەوڵدان دژی تەناهی نەتەوەیی ئێران و چالاکی پڕۆپاگەندە دژی نیزام، بە ٦ ساڵ زیندانی تەعزیری مەحکووم کرابوو.
بە پشتبەستن بە مادەی ١٣٤ی یاسایی سزای ئیسلامی، دەبێت ئەو چالاکە مەدەنییە کوردە، ٥ ساڵ لەو ٦ ساڵ زیندانە تەعزیرییە بە تۆمەتی "کۆبوونەوە و تەبانی بە مەبەستی هەوڵدان دژی ئەمنییەتی نەتەوەیی ئێران" بکێشێت.
سەعید ئیقباڵی، ڕێکەوتی ١٢ی ڕێبەندانی سآڵی ٩٦ لەلایەن ئیدارەی ئیتلاعاتی شاری کرماشان دەسبەسەر و پاش دوو ڕۆژ لە ڕێکەوتی ١٤ی ڕێبەندانی ساڵی ٩٦، ڕەوانە تاران و بەندی ٢٠٩ی زیندان ئیڤین کرا.
ڕۆژی چوارشەممە ٢٢ی خاکەلێوەی ساڵی ٩٧، سەعید ئیقباڵی چالاکی مەدەنیی کورد لە زیندانی ئێڤین بە دانانی بارمتە بە شێوەی کاتی ئازاد کرابوو.
