٩ چالاکی سێنفیی مامۆستایان بە دانانی بارمتە لە زیندانی سەقز ئازاد کران

ڕۆژی شەممە ٢٨ی جۆزەردان، "تاهیر قادرزادە، محەممەد فەتاحی، ئەنوەر فەرج‌زادە، سەلاح حوسێنی، حوسێن محەممەدی، کەیوان محەممەدی، خالید شێخی، لوقمان ئەڵڵامورادی و قادر یەسرابی"، لە ئەندامانی ئەنجومەنی سێنفیی مامۆستایانی کوردستان- سەقز و زیویە، بە دانانی بارمتە لە زیندانی سەقز ئازاد کران.

ئەو ٩ چالاکە سێنفییە بە دانانی بارمتە هەتا کاتی دادگاییەکەیان بە شێوەی کاتی لە زیندانی سەقز ئازاد کراون.

هەروەها ڕۆژی پێنجشەممە ٢٦ی جۆزەردان، "ئاوات ڕەزەوی" چالاکی سێنفی و ئەندامی ئەنجومەنی سێنفیی مامۆستایانی کوردستان- سەقز و زیویە، بە لێوەرگرتنی بەڵێننامە لە یەکێک لە گرتنگە ئەمنییەتییەکانی سەقز ئازاد کرا.

ئەو ١٠ چالاکە سێنفییەی مامۆستایان لە ماوەی ڕۆژانی چوارشەممە و پێنجشەممە ٢٥ و ٢٦ی جۆزەردان، لەلایەن هێزە ئەمنییەتییەکانەوە دەسبەسەر کرابوون.