چارەنووسی مامۆستایەکی ئایینی پاش ١٢ ڕۆژ لە دەسبەسەرکرانی ناڕوونە
پاش ١٢ ڕۆژ لە دەسبەسەرکرانی مامۆستا "مەلا یوونس نەوخا" خەڵکی شاری پیرانشار لەلایەن هێزە ئەمنییەتییەکانەوە، هەتا ئێستا چارەنووسی ناوبراو ناڕوونە.
سەرچاوەیەکی ئاگادار لەو بارەیەوە بە کوردپای ڕاگەیاند: "مەلا یوونس نەوخا کە لە ڕۆژی پێنجشەممە ١٦ی پووشپەڕەوە دەسبەسەر کراوە، لە گرتنگەی ئیدارەی ئیتلاعاتی ورمێ ڕاگیراوە و چارەنووسی ناڕوونە".
ئەو سەرچاوەیە هەروەها ئەوەشی خستەڕوو: "ئەو مامۆستا ئایینییە لە ماوەی دەسبەسەرکرانیدا لەلایەن ئیدارەی ئیتلاعاتی ورمێوە لە دەستپێڕاگەیشتن بە پارێزەر و چاوپێکەوتن لەگەڵ بنەماکەی بێبەری کراوە".
ئەو سەرچاوەیە هەروەها دەڵێت: "سەرەڕای ئەوەیکە بنەماڵەی نەوخا سەردانی ناوەندە ئەمنییەتی و دادوەرییەکانی ورمێیان کردووە، ئەو ناوەندانە لە دانی هەر جۆرە زانیارییەک لەمەڕ چارەنووسی ئەو مامۆستا ئایینییە خۆیان بواردووە".
ڕۆژی پێنجشەممە ١٦ی پووشپەڕ، هێزە ئەمنییەتییەکان بەبێ بەڵگەی یاسایی ئەو مامۆستا ئایینییەیان دەسبەسەر و بۆ لێپرسینەوە ڕەوانە گرتنگەی ئەمنییەتیی ئیدارەی ئیتلاعاتی ورمێ کردبوو.
مەلا یوونس نەوخا، بەهۆی ڕەخنەگرتن لە حکوومەت دەسبەسەر کرابوو. ناوبراو لە مامۆستایانی قوتابخانەی زانستی دینیی سەلاحەدینی ئەیووبیی شاری پیرانشارە.
