كوێستان و دارستانی دوو گوندی دیكەی کوردستان ئاگریان تێبەر درا

ئاژانسی كوردپا: شاخ و دارستانەكانی دوو گوندی دیكەی سەر بە شاری سەوڵاوا و مەریوان ئاگریان تێبەر درا و خەسارێكی زۆر بە لێڕوار و ژینگەی ناوچەكە كەوتووە.

بەپێی هەواڵی گەیشتوو بە ئاژانسی هەواڵدەریی كوردپا، رۆژی چوارشەممە رێكەوتی 1ی خەرمانان شاخ و دارستانەكانی دوو گوندی \"\"بیەكەڕە\"ی سەر بە شاری سەوڵاوا و \"دەرەوەران\"ی سەر بە شاری مەریوان ئاگریان تێبەر دراوە و زەرەر و خەسارێكی زۆر لە ناوچەكە كەوتووە و زیاتر لە 15 هێكتار دارستان لە ئاگردا سووتاوە.

سەرچاوەیەكی ئاگادار لە نزیك رووداوی ئاگركەوتنەوەكە بە ئاژانسی هەواڵدەریی كوردپای راگەیاند، ئەندامانی ئەنجومەنی سەوزی چیا و خەڵكی نیشتەجێی ناوچەكە پاش 5 كاتژمێر هەوڵ و تەقەلا توانیویانە ئاگری گوندی بیەكەڕە بكوژێننەوە.

بە وتەی هەمان سەرچاوە هەتا بڵاو بوونەوەی ئەم هەواڵە دارستان و شاخەكانی گوندی دەرەوەران هەر لە ئاگردا دەسووتێن.