هەشت هاووڵاتی لە شاری بانە لەلایەن هێزە ئەمنییەتییەکانەوە دەسبەسەر کران
ڕۆژی دووشەممە ٢٠ی پووشپەڕ، هەشت هاووڵاتیی کورد بە ناوەکانی "جەعفەر زەریفی، محەممەد مەحموودزادە، زانا مێهری، هادی مەحموودی، ئارام ساڵح‌پوور، ڕەحمان ساڵح‌پوور، مێهدی نەوروزی و ئەحمەد حوسێن‌پوور" خەڵکی شاری بانە، لەلایەن هێزە ئەمنییەتییەکانەوە دەسبەسەر و بۆ شوێنێکی نادیار ڕاگوێزران.
بە وتەی سەرچاوەیەکی ئاگادار، هێزە ئەمنییەتییەکان بەبێ بەڵگەی یاسایی لە ماڵ و لە شوێنی کار، ئەو هەشت هاووڵاتییە کوردەیان دەسبەسەر کردووە.
ئەو سەرچاوەیە هەروەها ئەوەشی خستەڕوو: "ڕەحمان ساڵح‌پوور و محەممەد مەحموودزادە، لە ماڵەکەی خۆیان و ئەو شەش هاووڵاتییەکەی دیکە لە شوێنی کارەکەیان دەسبەسەر کراون".
ئەو سەرچاوەیە هەروەها دەڵێت: "ئەو هەشت هاووڵاتییە خەڵکی گوندەکانی ساوان، سێوچ و شاری بانەن".
هەتا کاتی بڵاوبوونەوەی ئەم هەواڵە، لە هۆکاری گیران و تۆمەتی‌وەپاڵدراو دژی ئەو هەشت هاووڵاتییە کوردە، زانیارییەکی ورد لەبەر دەستدا نییە.
