هێرشی هێزەکانی ئیتلاعاتی سپای پاسداران بۆ سەر گوندی حەسەن نوورانی شنۆ
ڕۆژی سێشەممە ٢٧ی ڕەشەمە، لە کاتی بەڕێوەبردنی ڕێوڕەسمی چوارشەممەسووری لە گوندی "حەسەن نووران"ی شاری شنۆ، هێزەکانی ئیتلاعاتی سپای پاسداران، هێرشیان کردە سەر ئەو گوندە و پێشیان لە بەڕێوەبردنی ئەو ڕێوڕەسمە، گرت.
سەرچاوەیەکی ئاگادار لەو باریەوە بە ئاژانسی کوردپا ڕایگەیاند: "هێزە ئیتلاعاتییەکان سەر بە سپای پاسداران، هەڕەشەیان لە دانیشتووانی گوندی حەسەن‌نوورانی شنۆ کرد کە لە ئەگەری بەڕێوەبردنی ڕێوڕەسمی چوارشەممەسووری بانگهێشت و دەسبەسەر دەکرێن".
ئەو سەرچاوەیە هەروەها ئەوەشی خستەڕوو، هێزە ئیتلاعاتییەکانی سەر بە سپای پاسداران، ناوی سێ هاووڵاتییان بە ناوەکانی "سەلیم ئەسکەندەر، ڕەحمان ڕەسووڵ‌نژاد و سەنعان دانا" نووسیوە کە لە ئەگەری بەڕێوەبردنی ڕێوڕەسمی لەم چەشنە دەسبەسەر دەکرێن.
ئەو سەرچاوەیە باسی لەوەش کرد، سەرەڕای گوشار و هەڕەشەی هێزە ئیتلاعاتییەکان، بۆ سەر دانیشتووانی ئەو گوندە، خەڵک ڕێوڕەسمەکەیان بەڕێوەبرد.
لەلایەکی دیکەوە، لە مەهاباد، ناوەندە ئیتلاعاتی و ئەمنییەتییەکانی حکوومەتی لەو شارە، بە هێنانی هێزێکی زۆر و بڵاوە پێکردنی خەڵک بۆ پێشگرتن لە بەڕێوەچوونی ڕێوڕەسمی چوارشەممەسووری، کەشوهەوای ئەو شارەیان ئەمنییەتی کرد.
