هاووڵاتییەکی خەڵکی سەڵماس بەهۆی ڕاودوونان و تەقەی هێزە نیزامییەکانی حکوومەت کوژرا
23:03 - 20 رێبەندان 2720
ڕۆژی دووشەممە ۲۰ی ڕێبەندان، هاووڵاتییەکی کورد بە ناوی "بێهزاد هاشمی ئەسڵ"، کوڕی ئەحمەد و خەڵکی گوندی "بهیک" سەر بە سەڵماس، بەهۆی ڕاودوونان و تەقەی هێزە نیزامییەکانی حکوومەتی ئێران، گیانی لەدەست دا.
بە وتەی سەرچاوەیەکی ئاگادار هێزە نیزامییەکان، لە ڕێگای سەڵماس بۆ خۆی، بە گومانی هەڵگرنی شتومەکی قاچاخ، بە دوای ماشینی ئەو هاووڵاتییە دەکەون و دواتر تەقەی لێ دەکەن.
ئەو سەرچاوەیە هەروەها وتوویەتی: "هێزە نیزامییەکان لە ڕاودوونانی ماشینی بێهزاد، تەگەرەکانی ماشینەکەی دەکەنە ئامانجی گولـلە کە دەبێتە هۆی وەرگەڕانی ماشینەکەی".
ئەو سەرچاوەیە ئەوەشی خستە ڕوو کە: "ئەو هاووڵاتییە لەو ڕووداوەدا، بەهۆی قورسیی برینەکانییەوە، گیانی لەدەست داوە".
بێهزاد هاشمی ئەسڵ، خێزاندار و خاوەن سێ منداڵە.
