هاووڵاتییەک لە شاری مەهاباد دەسبەسەر کرا
ڕۆژی سێشەممە ٢٤ی جۆزەردان، هاووڵاتییەک بە ناوی "دیار عەباسی" خەڵکی گوندی " بەرەجۆ"ی بەخشی خەلیفانی شاری مەهاباد، لەلایەن هێزە ئەمنییەتییەکانەوە دەسبەسەر و بۆ شوێنێکی نادیار ڕاگوێزرا.
بە وتەی سەرچاوەیەکی ئاگادار، هێزە ئەمنییەتییەکان بۆ دەسبەسەرکردنی ئەو هاووڵاتییە چوونە ماڵەکەی و پاش پشکنینی ماڵەکەی، لە دەسبەسەرکردنی ئەو هاووڵاتییە سەرکەوتوو نەبوون.
ئەو سەرچاوە ئاگادارە هەروەها ڕایگەیاند: "هێزە ئەمنییەتییەکان بەبێ بەڵگەی یاسایی لە گۆڕەپانی ئیستقلالی مەهاباد، ناوبراویان دەسبەسەر کردبوو."
ئەو سەرچاوەیە هەروەها ڕایگەیاند: "چەند ڕۆژ پێش، دیار عەباسی بانگهێشتی ئیدارەی ئیتلاعاتی مەهاباد و لێپرسینەوەی لەگەڵ کرابوو."
دیار عەباسی پێشتر ئەندامی یەکێک لە حیزبە کوردییەکانی ئۆپۆزیسیۆنی حکوومەتی ئیران بووە کە دواتر گەڕابووەوە بۆ ئێران.
هەتا کاتی بڵاوبوونەوەی ئەم هەواڵە، لە هۆکاری گیران و تۆمەتی وەپاڵدراو دژی ئەو هاووڵاتییە زانیارییەک لەبەر دەستدا نییە.
