هاووڵاتییەک لە شاری بۆکان لەلایەن هێزە ئەمنییەتییەکانەوە دەسبەسەر کرا
13:12 - 22 گەلاوێژ 2722
ڕۆژی پێنجشەممە ٢٠ی گەلاوێژ، هاووڵاتییەک بە ناوی "ئیسماعیل کەریمی" تەمەن ٤٤ ساڵ خەڵکی گوندی "شەوریجە" و دانیشتووی "میرئاوا"ی بۆکان، لەلایەن هێزە ئەمنییەتییەکانەوە دەسبەسەر کرا.
بەوتەی سەرچاوەیەکی ئاگادار، هێزە ئەمنییەتییەکان ئەو هاووڵاتییە کوردەیان بەبێ بەڵگەی یاسایی دەسبەسەر و دواتر بۆ شوێنێکی نادیار ڕاگواستووە.
ئەو سەرچاوەیە هەروەها ئەوەشی خستەڕوو: هێزە ئەمنییەتییەکان دەستیان بە پشکنینی ماڵی ئەو هاووڵاتییە کردووە و هێندێک کەرەستەی ناوبراویان لەگەڵ خۆیان بردووە.
بەدواداچوونی بنەماڵەی ئەو هاووڵاتییە کوردە، بۆ ئاگاداربوون لە چارەنووسی ناوبراو، بێئاکام ماوەتەوە.
هەتا ئێستا لە هۆکاری دەسبەسەری و تۆمەتی وەپاڵدراو دژی ئەو هاووڵاتییە زانیارییەک لە بەردەستدا نییە.
ئیسماعیل کەریمی خێزاندار و باوکی سێ منداڵە.
